LESHELE 90 - Sumi Naga CL (Re-edited) Bible (BSI)

Kaku Abidiu Lhokta lono Lhokta

Alhou Timi Moses Kighini

¹ Ampeu, tiqheli kümtsü lo No ye ni kungo-a ke.

² Naghutoqo lho mphi lono, ayeghi eno ayeghiqha pulhosü mphi lono, pülhapuju lono pülhapuju lo No ye Alhou ke.

³ Nono timi pelo ayeghimkhu lo idewove pecheni eno, “Idewove lo, O timi nuliqo,” ipi cheni!

⁴ Kughengu O zülo ampe qhethonhe ye ighina tsala wove ketoi, momu putho süchedo lakhi wove ketoi ke.

⁵ Züqozü toi Nono panoqo yipe wuve cheni; panongu ye asamo toi, inaqhe atsüni ishe ipeghi aketoi:

⁶ ti ye inaqhe mini ipeghi no checheshi acheni; ikemu avelau ye ighüive no hailove cheni.

⁷ Kughengu O mlo kighide lono ningu pühave cheni; O loghu lono ningu ye thüghüive cheni.

⁸ Nono ni xine O zülo qhipüani, niw tuqho-tugho xine ye O zülo aküvü lo ani.

⁹ Kughengu ni tsala kümtsü O loghu lono wokhavae; ni mpe ye atuthukishe lakhi toi wovae.

¹⁰ Ni küxü mpe ye lhotsüni, momu mtotoi aghi namu lhotache; ikeghi aküxü süchedo ye aghime eno aveküsa likhie; paikhavi lono wove cheni, eno ningu ye yewuve cheni.

¹¹ Khuu no O mlo kighide küka ithi ani kea? Kughengu O loghu ye O sümsa masa kepu qhemi ke.

¹² Ikehu ni tsalaqo kihilu penike ni shikalo tishianguno ningu ye alokütsü mlo ithulu nani.

¹³ Ideighi lo, O Ampeu! Khitohi kea? O qemiqo shou kikimiye alo!

¹⁴ Inaqhe Ow iqemokeu kikimiye pesü ni ghapiqi tsülo, tishiaye ningu no ni küxü tivilo alovi eno aloqilu nani.

¹⁵ Nono ningu shikighime keu tsala qhemi, eno alhoksa ni pelo ithulupe keu mpe qhemi ni lopivi tsülo.

¹⁶ O qemi lau O kümla piye tsülo, eno pano tianuli lau O juküvü küka piye tsülo.

¹⁷ Ampeu ni Lhou mlokiqi no ni shou apelo, ni kümla lo tokulupu ni tsülo; iyei, ni kümla lo tokulupu ni tsülo!