LESHELE 9 - Sumi Naga CL (Re-edited) Bible (BSI)

I no Akümzapu Kümlaqo Kihikitheni

Davidw Leshele.

¹ I mlo kuchopu pesü I no Ampeu lau shikimthi tsüni; I no Ow akümzapu kümlaqo kümtsü kihikitheni.

² Ni ye O lau alovi eno alokiqi shini; O Shishe Akiqheu, I no O je sheqhe ghi ale pheni.

³ Kughou I ghümiqo no tsüghü wove keno, panongu no küpxalu no O zülono pühave.

⁴ Kughengu Nono I chipiu tucho tsüe; Nono aküka lakhü lo iqa no achipiu xakütha tsüke.

⁵ Nono shiyeqo lomipi; Nono küsaküghami pühave tsüe; Nono alhokupuju eno alholo panoqo je nuxave tsüe.

⁶ Aghümi ye pülhapuju kütsave keu lono kishekhavae; panow mishighünaqo ye nhüvae; pano kümsülu kepu ye pühavae.

⁷ Ikemu Ampeu ye alhokupuju kükalakhü lo iqa ani; Pa no kuchou xakütha ghenguno Pa kükalakhü shiqhe,

⁸ Pa no achipiu mikucho pesü ayeghiqha küghatha cheni; Pa no müzüchoi timiqo shou küghatha cheni.

⁹ Ampeu ye qhasüpe akemi ghenguno sükusho-a ke, aküpüna ghuloki lo sükusho-a lakhie.

¹⁰ Khunono O je ithi ani keno pano no O pükhübe cheni, kughengu, O Ampeu, No ye O phuche kemi pheve chemoe.

¹¹ Ampeu, Zion lo kükalakhü lo iqa akeu lau shekiqhe le phelo! Ashiayeqo vilo Pa kümla pilo!

¹² Kughengu Pa ye amkhü kulumi kümsüma chemoe; Pa ye aghime shi akemi küqa kümsümave chemoe.

¹³ I küpüqhiyi tsülo, O Ampeu! O, No khuu akithi khagho lono I sünhelu cheni keno, I mithi kemi launo I ghime kitikhi ithulu tsülo,

¹⁴ tishianguno I no Ow shekiqhe kümtsü kümsü luni, Zion limi khagho lono I no Ow xakulu lono alovini.

¹⁵ Shiyeqo ye pano no aqo chhukeu lo ilovae; pano no küsü püakeu lichhe lono pano pukhu meluvae.

¹⁶ Ampeu no Paw küghakütha pephe piyevae; küsaküghami ye pano u lo kümla lono kitime luvae.

¹⁷ Kixikilami eno Alhou kümsümave kemi shiyeqo ye kümtsü Kithigha lo wuve nani.

¹⁸ Kughengu athokhami ye alhokuthu kümsümave monani, eno kumlhomiw lajupu ye alhokupuju pühave monani.

¹⁹ Ithulo, O Ampeu! Timiqo pelo toluvepe kevilo; O zülono shiyeqo shou küghathabe tsülo!

²⁰ Aküighüpu lo panoqo süvelo, O Ampeu! Shiyeqo pelo panongu ye timi kepi ithi pelo!