LESHELE 89 - Sumi Naga CL (Re-edited) Bible (BSI)

I no Ampeu w Iqemokeu Kikimiye Ghili Le Pheni

Ethan Le

¹ I no alholo Ampeuw iqemokeu kikimiye le pheni; O pükhükulu ghili tiqheli kümtsü lo I kichi lono sheshuni.

² Kughengu I no pi, “Iqemokeu kikimiye ye alhokupuju shiqhe nani; kungugha lo Nono O pükhükulu pephe nani.”

³ Nono pivae, “I no Iw kishekiphemi sasü puloshoqhi shivae; I no I qeu David lau tushoqhivae:

⁴ ‘I no alholo o laghami iqhikumto tsüni, eno alholo o kükalakhü shiqhe tsüni.’”

⁵ O Ampeu, kungugha no O kümzapu kümla, akimthemi hoho lo O pükhükulu ghili sheqhe pelo!

⁶ Kughengu atsütsü qholo khuu no O sasü kimhe luni kea? Kungughami khuu no O toike ani kea?

⁷ Shishe akimthemi hoho lo gihuküzüpu Lhou, O vehope akeqo nguno alau akighiche khuu ani kea?

⁸ O Ampeu aqokitikhi Lhou, O Ampeu, O pükhükulu no O vehope aketoi khuu no O toi akughushu kea?

⁹ Nono azüghi küka shou ayepe; kughou tipau zü tukucho keno, Nono ghasüve.

¹⁰ Nono kithikumo toi aghawu Rahab munudaqhi; Nono O küka kumto pesü O ghümi haleve.

¹¹ Kungugha ye Ow; ayeghi ghi Ow; ayeghi eno tile akeu kümtsü Nono lhoke.

¹² Nono ahuu eno apeu ghi lhoke; Tabor eno Hermon no alokivi shi O je shipili.

¹³ No ye akughushu küka ani; O u ye akumto, O u ajeu ye qhemghai ke.

¹⁴ Achipiu mikucho eno kuchou xakütha no O kükalakhü boqha; iqemokeu kikimiye eno pükhükulu no O züu checheni.

¹⁵ Khunono O gi küvü lo checheni, eno tiqhetini lokivi ghügha ithi ani keno pano lokivipue,

¹⁶ khunono atsala kupuju O je sheqhe cheni eno O chipiu mikucho sheqhe cheni keno pano lokivipue.

¹⁷ Kughengu No ye panoqo juküvü kumto ke; O kikimiye vecheo niw fulili küighani.

¹⁸ Kughengu No ye pano juküvü eno akumto ke, eno O kikimiye vecheo Nono ningu kibo süqhe tsüe.

¹⁹ Khaghi Nono kungunhetsü lono küpülümi pütsa no pi: “I no aghütou lakhi kuphuvae; I no timiqo dolo milakhi kishelu keu süqhevae.

²⁰ I no I qeu David ithulue; thazü kimthe pesü I no pa nukishevae,

²¹ I u pesü pa iqhikumto nani; I küka no pa shikumto nani,

²² Aghümi ye pa mqüqhimo nani; kixikilami ye pa shikuchuni mla nani.

²³ I no pa zülono pa ghümi munudaqhi no pa mithi chekemi hekulu qhive nani.

²⁴ I pükhükulu eno Iw iqemokeu kikimiye no pa gholo anani, eno I je lono pa kibo süqhe nani.

²⁵ I no azüghi shou pa u süqhetsü nani eno pa u ajeu pesü aghokiqo shou ghope qhinani.

²⁶ Pa no I lau ighamku pi nani, ‘No ye I pu ke, I Lhou eno I xakulu tuqu ke.’

²⁷ I no pa pesü anu anoghiu shitsü nani, ayeghi lo kükami nguno akiqheu shipe nani.

²⁸ I no alhokupuju Iw iqemokeu kikimiye pa sala qhitsü nani, eno Iw puloshoqhi ye pa ghenguno akumto shi qhinani.

²⁹ I no alhokupuju pa tikughuko süsü nani eno pa kükalakhü ye kungugha tsala toi shitsü nani.

³⁰ Tsala pa nuliqo no I yezah pheve eno I zakütsü kiqi lono chemove aye,

³¹ tsala panoqo no I khuaye hebide eno I zakütsü pape move aye,

³² pano xine eno akipimi ghenguno I no aqheküsü ngo akighikipili pesü ghime nani,

³³ ikemu pa launo Ni ye Iw iqemokeu kikimiye ikhivemo nani momu Iw pükhükulu ye kichile shivemo nani.

³⁴ Ni ye Iw puloshoqhi hexamo nani momu I kichi lono pikeu tsa kilivemo nani.

³⁵ Alhokuthu ghenguno ghuthu khavino I kimthe lono I no tushoqhivae; Ni ye David lau mikivemo nani.

³⁶ Pa tikughuko ye alholo ache nani khetsünhe ake tivilo pa kükalakhü ye I zülo anani.

³⁷ Aqhi no atsütsü lo pükhükulu thopi shi ache ketoi ti ye alholo ache nani.”

³⁸ Ikemu itehi ye Nono peve eno milivae; No ye Ow nukikishe lau O loghu no chhitoi ani.

³⁹ No ye O qeu sasü puloshoqhi shikeu phevae; Nono pa küka kütsüqho ayeghimkhu lono kitiqeve tsüae.

⁴⁰ Nono pa liwo kubove tsüae; Nono paw sükusho-a kütsave tsüae.

⁴¹ Pa katha chekemi kümtsü no pa pükaqhi; pa ye pa kisüghümi zülo atichepu shivae.

⁴² Nono pa ghümi u ajeu süqhe tsüe; Nono pa ghümi kümtsü pelo alovi peke.

⁴³ Nono pa zütakikihi kütsügha pelo idechile ighipe, eno Nono pa pelo aghüshiqa lo puthugho pemoe.

⁴⁴ Nono pa jekipi kishekhave tsüae eno pa kükalakhü ayeghi lo kuluqhive tsüe.

⁴⁵ Nono pa lhothe tsala ghitha kughukhove tsüae; eno akukujo pesü pa khonhavae.

⁴⁶ O Ampeu, khitohi kea? No ye alhokupuju itshüveni keshea? Khitohi O loghu ye ami toi iqü anani kea?

⁴⁷ I do ye kishi ikhonhei keno kümsü lulo! Kughengu No ye kiu vehu küküha lono timi lho kea!

⁴⁸ Kiu timi no xüa no khilemu akithi ithulumo nani kea? Khuu no Kithigha küka lono pa ngulho xaphe luni kea?

⁴⁹ Ampeu, khaghi Ow iqemokeu kikimiye khipa pesü O pükhükulu lono David lau tushoqhi keno ti ye khile ania?

⁵⁰ O Ampeu, kishi O qemi junuqhi ani eno I no kishi shiye kutomo no thogha keu I mlo lo xapu keno kümsü lulo,

⁵¹ tipa pesü O ghümi no junuqhi ke, O Ampeu, panongu no Ow nukikishe pukhune sükiqhe junuqhi ke.

⁵² Alholo Ampeu sheqhelo! Amen, Amen.