LESHELE 88 - Sumi Naga CL (Re-edited) Bible (BSI)

I no O zülo Putho Pucho Qae

Korah Nuliqow Leshele

¹ O Ampeu, I xakulu Lhou; I no putho pucho kupuju O zülo qae.

² I kighini pelo O zülo ighilu pelo; I küqa lo O kini kugho puwo tsülo!

³ Kughengu I ngulho ye aveküsa no chhitoi ani, eno I küxü ye Kithigha kupunu ayae.

⁴ Ni ye aqo lo ikiqi ilove kemi gholo kihisü auvae; ni ye aküka küha kemi timi lakhi shivae,

⁵ kithimi gholo phesüve ketoi, ghiqhive kemi akumoki lo thi akemi toi, Nono khunoqo kümsüchile move akeno panoqo toi, kughengu panongu ye O launo ikhive ake.

⁶ Nono aqo kutho, aküzü eno akuthoku lo I vesüve.

⁷ O loghu no mishishei I qape ani, fukukucho no I mhoqhi ani.

⁸ Nono I shompami pelo I qhivepe; Nono I küghape panoqo zülo aküighüpu shivepe, I khatha süve no ni ye pomlavae;

⁹ aghime lono I nhethi ye zamemeivae. Ghulo atsütsü I no O ku cheni, O Ampeu; I no O lau I u sükhope ani.

¹⁰ No ye kithimi ghenguno akümzapu mla tsücheni keshea? Kithimi ye xüthughi no O sheqhe cheni keshea?

¹¹ Akumoki lono Ow iqemokeu kikimiye momu Kütsakungo-a lono O pükhükulu sheshu cheni keshea?

¹² Aküzü lono akümzapu kümla, momu kümsümaveke-a lono amikucho ithilu cheni keshea?

¹³ Ikemu O Ampeu, I no O lau ighamku ani; inaqhe no I kighini pesü O zülo ighi ani.

¹⁴ O Ampeu, No ye kushiye I ngulho peve ania? No ye kushiye I launo O gi küsüve ania?

¹⁵ I lhothe lono ni ye aghime shive no thiveni keshive; ni ye Nono aghime tsükeu makho xapu lhovae.

¹⁶ O loghu no I vesü ikughivae; Ow aküighüpu huno ghimeqhi keu no I kütsaqhi ke.

¹⁷ Panongu no atsala kupuju atshünazü toi I sühope ani; panongu no botha iloghivae.

¹⁸ Nono I qhuu eno I küsau pelo I qhivepe; aküzü no I küsau shivae.