LESHELE 86 - Sumi Naga CL (Re-edited) Bible (BSI)

Ow Iqemokeu Kikimiye Kije

David Kighini

¹ O Ampeu, O kini kughopuwo lo eno I khochile tsülo, kughengu ni ye athokhami eno aveküsami ke.

² I küxü püxü tsülo, kughengu ni ye küpülümi ke; O qeu O pükhü chekeu xalulo, No ye I Lhou ke.

³ O Ampeu, I küpüqhiyi tsülo, kughengu ni ye O lau atsala kupuju qa ani.

⁴ O qeu ngulho lopivi tsülo, kughengu O Ampeu, O lau I no I ngulho saghi ani.

⁵ O Ampeu, No ye aloe eno akipimi qhitsü cheni, O ku chekemi kümtsü lau iqemokeu kikimiye piye cheni.

⁶ I kighini lo O kini kugho puwo tsülo, O Ampeu; küpüqhiyi tsü penike qhüiniju keu ini tsülo.

⁷ I veküsa tsala lo I no O kue, kughengu Nono I khochile tsü cheni.

⁸ O Ampeu, O toikeu lhou kütau khumu kühae, O kümla toike kiumu kühae.

⁹ Nono shiye lhokemi kümtsü no O zülo ighi no itsaqi O mlla nani, O Ampeu, eno O je sheqhe nani.

¹⁰ Kughengu No ye kije eno akümzapu kümla shicheni; O likhi no Alhou ke.

¹¹ O laghi I shikalo, O Ampeu, tishiaye I no Ow kuchou laghi lo checheni; O je sümsa penike I mlo lakhishi tsügha tsülo;

¹² O Ampeu I Lhou, I mlo kuchopu no shikimthi keu O tsüni eno alholo O je sheni.

¹³ Kughengu I lau Ow iqemokeu kikimiye akeu ye kije ke; Nono Kithigha kutho lono I ngulho xaphe tsüke.

¹⁴ O Alhou, aqheküzami no I lachile ithughivae; ayiküsami loji no I küxü phucheni, panongu ye O sümsa chemoe.

¹⁵ Ikemu O Ampeu, No ye kimiyekini eno küpükini Lhou, amloideni keu lo asheshi, iqemokeu kikimiye eno pükhükulu no chhitoi ke.

¹⁶ I lau tsüghü ighi lo eno I küpüqhiyi tsülo; O küka pesü O qeu tsülo, eno O qeliu nu xalu tsülo.

¹⁷ Nono kimiyetsü akeu michipu I piyelo, tishiaye I mithi chekeqo no ti ithulu no kujove nani kughengu Ampeu, Nono I kuphu eno I lokughuno tsüke.