LESHELE 85 - Sumi Naga CL (Re-edited) Bible (BSI)

Ni Xükithe tsülo

Korah Nuliqow Leshele

¹ Ampeu, Nono O yeghi kimiyeqhiyi tsüke; Nono Jacob küakini kükümgha tsüchile.

² Nono Ow timi kipimi qhitsüe; Nono panoqo xine kümtsü jonhave tsüe.

³ O loghu kümtsü süchileve; O mlo kighide külü lono Nono tsüghüve ke.

⁴ Ni thoputho tsülo, O ni xakulu Lhou, eno ni launo O mlo kighide ikhipe wuve tsülo!

⁵ No ye pülhapuju ni lau amloide anani keshea? No ye tiqheli kümtsü lo O mloide anani keshea?

⁶ Ow timiqo pelo O launo alokivi shilu apenike No ye ningu pesü xükithe tsü monani keshea?

⁷ Ow iqemokeu kikimiye ningu piye tsülo, O Ampeu, eno Ow xakulu ningu tsülo.

⁸ Ampeu Alhou no kiu piani keno I pelo chilu pelo, kughengu Pa no Paw akimthemi lau aloino keu tsa pi nani; ikemu pano pelo mbomzü lo ilovepe kevilo.

⁹ Mtsüqheino Paw xakulu ye Pa sümsa chekemi phivilo ani, tishikeu lono ajuküvü ye ningu yeghi lo anani.

¹⁰ Iqemokeu kikimiye ngo pükhükulu ye kusholu cheni; achipiu mikucho ngo külakishi ye kümüma kilelu cheni.

¹¹ Pükhükulu no ayeghi lono vephe ipeghi cheni, eno achipiu mikucho no atsütsü lono jupiqi cheni.

¹² Iyei, kiu no akivi keno Ampeu no tsü nani, eno ningu yeghi lo tipau ikoishe ghile hulu nani.

¹³ Amikucho no Pa zülo chewu nani eno Pa pukhu nepa kutotsü nani.