LESHELE 84 - Sumi Naga CL (Re-edited) Bible (BSI)

Alhou Ki Kümsü

Korah Nuliqow Leshele

¹ O Aqokitikhi Mpeu, O kungo-a ye kiutoi aghile kela!

² Ni ye Ampeu kungo-a kümsükütü kelauno I ngulho no khekulho shi, iyei, thiqhi ani; I mlo eno I phimpi no xüküau Lhou ghenguno alovi ighamku ale phe ani.

³ Tüghashoqhi ghi aki acheni, akhalu ghi ati khokepu püsü, O kümlla khache shou acheni, O aqokitikhi Mpeu, I kükau eno I Lhou.

⁴ Khunono O chineki lo acheni eno O sheqhe cheni keno alokivipue!

⁵ Khuno kumto O launo ithulu cheni keno, khuno mlo lo Zion lo kuwu laghi ani keno alokivipue.

⁶ Baca Khila kathawu chekelo panongu no tipau lo azüpukiqo mlape qhi; tsütsüghu atüghüu no ti ayizükucho shepichhi ke.

⁷ Panongu no alau-alau akumto shikithe wuve, milakhikhi no Zion lo Alhou zülo ighie.

⁸ O Ampeu aqokitikhi Lhou, I kighini chilu tsülo; O Jacob Lhou, akini kugho puwo tsülo!

⁹ O züto julo, O Alhou; Nono nukishe luve keu gi lo jupuku tsülo!

¹⁰ Kughengu O chineki lo ghulo lakhi akeu huno khileala ghulo qhethonhe akeu nguno akiviu ke. Kixikilami kilo xüani kepu ye I Lhou ki hukikha kheu shi auve keu pavie.

¹¹ Kughengu Ampeu Alhou ye khetsünhe eno azüto ke; Ampeu no kikimiye eno agigihu pesü tsücheni. Khunono müzüchoi xücheni keno pano launo thime kivi kiumu süchileve chemoe.

¹² O aqokitikhi Mpeu, khunono O pükhü cheni keno alokivipue!