LESHELE 83 - Sumi Naga CL (Re-edited) Bible (BSI)

Inaqhoive Kevilo, O Alhou

Asaphw Leshele

¹ O Alhou, inaqhoi auve kevilo; inaqhoi momu iqünhei auve kevilo, O Alhou!

² Kughengu julo, O ghümi no mbumghu ani; O mithi chekeqo no pano kütsü peqhe ithughivae.

³ Panongu no Ow timiqo shou mqümgha kuchughu ani; kümtsa kuchughu no Ow akughupu timiqo lachile ani.

⁴ Panongu no pi, “Ighilo, ningu pano shiye kütsaveni; Israelmi ye alholo kümsümave penie!”

⁵ Kughengu panongu no akükümsü lakhi lono kuchughue; panongu no O lachile visho shie

⁶ Edommi eno Ishmaelmi, Moabmi eno Hagritmi,

⁷ Gebalmi, Ammonmi eno Amalekmi, Philistiami eno Tyre lo küxümi;

⁸ Asshurmi ghi pano gholo küqhae; panongu ye Lot nuliqo kükakumto ke.

⁹ Nono Mediami shou mla ketoi panoqo lau ghi mla lo, eno Kishon ghoki lo Sisera ngo Jabin lau shike toi shitsülo,

¹⁰ panongu ye Endor lono kütsave ayeghi lo tübatüzü paphi shive.

¹¹ Panow sakiphemi pesü Oreb ngo Zeeb toi shitsülo panow kükapumi kümtsü Zeba ngo Zalmunna toi shitsülo,

¹² pama no pike, “Ningu dolono Alhou tsüni kümtsha-a amheghi shi luveni nolo.”

¹³ O I Lhou; panoqo ye ayeghimkhu fukichighi toive pelo, amülhü zülo amuu toive pelo.

¹⁴ Ami no aghasa pitimaha keshi, ami mili no naghuto piti keshi,

¹⁵ Ow pasapagha no panongu hakuqoqhi lo, eno amülhü küsa no panoqo shithüghüi lo!

¹⁶ Akukujo no panoqo gi küzüve tsülo, tishiaye panongu ye O phuighi luvie, O Ampeu.

¹⁷ Panongu ye alholo kujove eno aghüthisüve pelo; panoqo pelo kujomza keu lono pühave pelo,

¹⁸ tishiaye panongu no O likhi no Ampeu, eno ayeghi kümtsü shou Shishe Akiqheu kepi ithive nani.