LESHELE 81 - Sumi Naga CL (Re-edited) Bible (BSI)

Iw Timi no I Tsa Initsü keaye lae

Asaph Le

¹ Ni kumto Lhou lau ighamku ale phelo; Jacob Lhou lau alokivi shi ighalo!

² Ale sülo; amqübo küigha lo, akighilebo jeli lono inikivile phelo.

³ Aqhi kithe eno aqhi kichhi lo ni ghulhu tsala lo afuko ighalo.

⁴ Kughengu hi ye Israel ghenguno akhuaye ke, Jacob Lhouw pimheye ke.

⁵ Kughou Pa no Egypt yeghi leighi keno tileno Pa no xaküthaza shipe Joseph tsüe. I no mthakeu tsa lakhi chilue:

⁶ “Nongu bighi lono I no amakho ikhive tsüe; ashoghi kipe lono nongu u kümthü tsüke.

⁷ Aghime küsa lo nongu no I ku, eno I no nongu xaphe; Pasapagha-a lono I no nongu khochile; Meribah züpuki lo I no nongu ghükeju ke.

⁸ O Iw timiqo, I no nongu vilo piputo akeu inilo! O Israel, nongu no pulo aghi aye I tsa inilo!

⁹ Nongu gholo khilemu inaghami lhou ape kevilo; nongu ye inaghami lhou lau pishiqho kevilo.

¹⁰ Ni ye Ampeu nongu Lhou, Egypt yeghi lono nongu saipeghi keu huke. Nongu kichi xükholo, I no tipau shepichhi loji tsüni.

¹¹ “Ikemu Iw timiqo no I tsa initsü moe; Israel no I lau qhoqhü ighimoe.

¹² Ikehu pano no shinishi keu kükümsü pape wuve peniye I no pano pesü amlo kuthovi keu shive peke.

¹³ O, Iw timiqo no I tsa initsü keaye, Israel ye I laghi lo checheni cheke!

¹⁴ I no paikhavi pano ghümi leluveni cheke eno I u peqhepe pano ghümi lachileni cheke.

¹⁵ Ampeu mithi chekemi no Pa zülo ipu-itsaqi nani, eno panongu ye alhokuthu aghimeshi nani.

¹⁶ Ikemu Pa no athi akiviu pesü nongu loji nani, eno atuki lo akhingozü pesü I no nongu ghapiqi tsü nani.”