LESHELE 80 - Sumi Naga CL (Re-edited) Bible (BSI)

O Alhou, Ni Xükithe tsülo

Asaphw Thopi Leshele

¹ Akini kugho puwo tsülo, O Israel kheu, Nono ambe loji saphe keshi Joseph shiaye saphe lo! No, Cherubim chishibo shou iqa ngo achekeu, aküvü yepüvü lo.

² Ephraim, Benjamin, ngo Manasseh zülo O kumto pephe, eno ighi no ningu xaphe lulo!

³ O Alhou, ni thoputho tsülo; O gi yepüvü lupelo, tishiaye ningu ye xaluve nani!

⁴ O Ampeu, aqokitikhi Lhou, ado khitohi Ow timiqo kighini shou axuide anani kea?

⁵ Nono ningu pelo amlo ghime ghulhu ilhupe, eno anhezü kipiji jukhu chhitoi tsüno yepeke.

⁶ Nono ni kisüghümi pelo ni ghenguno kohakishi peke, eno ni ghümi no pano dolono ningu junuqhi ke.

⁷ O aqokitikhi Lhou, ni thoputho tsülo; O gi küvü yepüvü tsülo, tishiaye ningu ye xaluve nani!

⁸ Nono Egypt lono atsaibo lakhi peighi; Nono shiyeqo haleve eno tipau shosüe.

⁹ Nono tipau yeghi shikimthe; tipau kuhu thonhei qüilove eno ayeghi kümtsü nhakhalu ke.

¹⁰ Naghutoqo ye tipau kicheqho no küzüluve, cedar sübo kuloghi shonha luve.

¹¹ Tipau lokaqo no azüghi kutolo qüilo eno tipau khuni no Aghoki kutolo qüwuke.

¹² Tishiaye kushiye No ye tipau kuptu hephove tsü kea? Tishikeu lono ti katha chekemi no axathi xoluve anie.

¹³ Aghasü lo amini no ti külhüvae, eno aluza lo tüghashiqo no chu ani.

¹⁴ O aqokitikhi Lhou, tsüghü ighilo! Kungugha lono jupiqi tsülo; atsaibo shosü püakeu xalulo,

¹⁵ O u ajeu no shosü püakeu sübo kuhu Nono saputhu keu nu süsholo.

¹⁶ Panongu no ami pesü ti pitive tsüae; ti loqhivae; axukighide lono pano kütsave lo!

¹⁷ Ikemu timi nu khuu Nono saputhu no akumto shilupe keno O u ajeu akeu timi hu shou O u belo.

¹⁸ Tileno ningu ye O launo tsüghüve monani; ningu püxü tsülo, eno ningu no O je sheqheni!

¹⁹ Ni thoputho tsülo, O Ampeu aqokitikhi Lhou! O gi küvü yepüvü tsülo, tishiaye ningu ye xaluve nani!