LESHELE 8 - Sumi Naga CL (Re-edited) Bible (BSI)

O Je ye Kiutoi Akughushu kela

Davidw Leshele

¹ O Ampeu, ni Lhou, ayeghi kümtsü lo O je ye kiutoi akughushu kela! Nono atsütsü shou O juküvü qhawoe.

² Nono amkhü kulumi ngo aghümi ghasüve niye Anga kughunu ngo ititunu kichi lono, O ghümi ghenguno akumto ghope qhie.

³ Kughou I no O tsütsü lo O u lo kümla, aqhi eno ayepu, Nono ghope qhikeqo juni keno,

⁴ timi ye kiu keno No ye pa kümsülu cheni, eno timi nu ye kiu keno No ye pa hiju acheni kea?

⁵ Ikeghi Nono kungugha lomi nguno kitila aqhou shi pa lho eno ajuküvü ngo agigihu pesü pa kütsükuqho shitsüe.

⁶ Nono pa pelo O u lo kümla shou yepeu shive peae; Nono thime kümtsü pesü pa pukhu philo qhive tsüae,

⁷ ambe ngo amshitsü, eno aluza lo tüghashiqo ghi,

⁸ atsütsü lo aghau, eno azüghi lo akha, azüghi lo lhoxü kümtsü pesü pa pukhu philo qhive tsüae.

⁹ O Ampeu, ni Lhou, O je ye ayeghi kümtsü lo kiutoi akughushu kela!