LESHELE 79 - Sumi Naga CL (Re-edited) Bible (BSI)

O Ampeu , Khitohi Kea?

Asaphw Leshele

¹ O Alhou, shiyeqo ye O mheghi lo iloghivae; panongu no O kimthe chineki shipixive tsüae; panongu no Jerusalem kütsavae.

² Panongu no O qemiqo sükumo pesü atsütsü lo aghauqo chuqupu shi peniye tsüvae, Ow pükhükulumi sükumo pesü ayeghi lo tüghashiqo tsüvae.

³ Panongu no azü pele akeshi Jerusalem kümtsü aji pelevae, eno shiqhoni kemi kühavae.

⁴ Ningu ye ni cheaxümi zülo atichepu shivae, ni sümxape akeqo no junu eno pipütha anie.

⁵ Ampeu, khitohi kea? No ye alholo amloide anani kea? O nhekushu ye ami toi iqüni keshea?

⁶ No mtha kemi shiyeqo lau, eno kükaqha khunono O je ku chemo keno pano shou O mlo kighide lepuku lo!

⁷ Kughengu panongu no Jacob tsüqhi chuvae eno pa ghüna-a kütsave tsüae.

⁸ Khaghi ni kipimiqo kümsülu tsü kevilo; O kikimiye no mtazü ni sasü kusholu pelo, kughengu ningu ye aveküsapu shivae.

⁹ O je kipipu ghenguno ni kuphulo, O ni xakulu Lhou; O je lono ni xaphe tsülo eno ni xine lono shikimthe tsülo!

¹⁰ Kushiye shiyeqo pelo, “Pano Lhou khile ani kea?” ipi apeni kea? O qemiqo ji pele keu mkhükulu ye ningu nhethe lono shiye kümtsü pelo ithi pelo!

¹¹ Akughumi ghimeküqa O zülo ighi pelo; O küka kije lono pithive niye akemi khaqhi phevelo.

¹² Ni cheaxümi no O shou O cheqhi akeu ghenguno aghime ghuthu tsüni kutolo tsülo, O Ampeu!

¹³ Ikemu ningu Ow timi, O tsüni kümtsha lo ambeqo ye alholo shikimthi keu O tsüni; tiqheli tiqheli kutolo ningu no O shekiqhe le pheni.