LESHELE 78 - Sumi Naga CL (Re-edited) Bible (BSI)

Hithiu Tiqhelimi vilo Pilo

Asaph Le

¹ O Iw timiqo, Iw shiküka inilo; nongu kini kugho puwo no I no pikeu tsa lo amlo tsüqhiyi lo.

² Kimghikipiye lono I kichi xükho no pini; khaghi lo aküzü tsaqo I no lhepiyeni,

³ Ningu no chilu eno ithive keu ghili, khikhi ni puasüqo no ni vilo pi keno tipaqo ghilike.

⁴ Pano tianuli launo ningu ye tipaqo küsüve moni, ikemu Ampeu juküvüpu kümla ngo Pa kughushu, eno akümzapu kümlaqo khikhi Pa no mla keno tipaqo pesü ighini keu tiqhelimi vilo pini.

⁵ Pa no Jacob lau ashepe lakhi tsü eno Israel lo Ayezah süsü tsüe, Pa no ni puasü vilo pano tianuli shika penike azah tsüe,

⁶ tishianguno hithiu tiqhelimi pelo tipaqo ithi peni, eno panoqo no itaghi punu mphi keqo pano tianuli vilo pikibe peni.

⁷ Tileno panongu no panow pükhükibe Alhou lau qhilu nani Alhou kümla kümsüma monani, eno Pa zakütsüqo papelu nani;

⁸ panongu ye pano puasüqo toi kuthovi eno hekibide tiqheli shimo nani, ni puasüqo tiqheli ye iqemokeu mlo xapusü Alhou pükhükulupu shimove.

⁹ Ephraim ye shexilika xapu luve no, aghükishi tsala lono idechile ighive ke.

¹⁰ Panongu ye Alhouw puloshoqhi pemove, eno Pa yezah kiqi lono checheni keu milive.

¹¹ Panongu no Pa kümla eno Pa no akümzapu piye keqo kümsümave ke.

¹² Egypt yeghi lo, Zoan luza lo Pa no pano puasüqo nhethe lono akümzapu mlae.

¹³ Pa no azüghi kijethave no panoqo pelo kathape, eno azü pesü amoqhe püake toi puthugho peke.

¹⁴ Puchou no khüngküsü lo panoqo saphe sawu, eno putho kümtsü lo ami küvü no panoqo sawue.

¹⁵ Pa no asayeqha lo atuqu hepho no azüghi lo toi azü yelu kepu pofushi tsüe.

¹⁶ Pa no atuqu lono aghokiti qoipeghipe eno azü no aghoki zü toi qowupe.

¹⁷ Ikeghi panongu no itaghi alau Pa shou axine shive, asayeli lono Shishe Akiqheu hebide ithughie.

¹⁸ Panongu no pano mlo lono Alhou peju ke, ti ye achuqupu panongu no chunishi keu khukeu lono ke.

¹⁹ Panongu no Alhou lachile pi, “Alhou ye asayeqha lo aghulhu lüpa qhitsü nani keshea?

²⁰ Pa no atuqu hepho kelo azü no qoipeghi eno aghokiti zü qole ipeghie. Pa ye ashopa momu Paw timi ghenguno ashi tsülu nani keshea?”

²¹ Tighenguno Ampeu no chilu kelo aloghu no chhitoive; Pa no ami pesü Jacob pitiqhi, Israel shou Pa xuide ipeghi,

²² kughengu panongu no Alhou pülü moe Paw xakulu küka pükhübe moe.

²³ Ikemu Alhou no kunguu atsütsü azah tsü eno atsütsü hukikha khaqhive tsüe,

²⁴ Pa no panoqo shou manna chukepu ghuqhi tsü eno kungugha lono ashothi panoqo tsüe.

²⁵ Timi no kungumi shopa chuke; Pa no achuqupu kupukuno shi panoqo tsüe.

²⁶ Pa no kipelau mülhü pelo mülhüpe, Pa küka no apeu mülhü ghi hakilhe puthuke;

²⁷ Ayeghimkhu toi Pa no ashi ghuqhi tsü, azüghi mkülo asaye toi achishibo kupu ghau puwu;

²⁸ Pa no aghauqo pelo pano ghazü lo iqighipe, pano phiki kümtsü veho ighipe.

²⁹ Panongu no chuno aghaqilu, kughengu Pa no panongu no chunishi keu tsüke.

³⁰ Ikemu panongu no chukha lumphi lono, achuqupu no panongu kichi lo aphi lono,

³¹ Alhou mlo kighide panoqo shou ikughive, panoqo gholo akumtomi pithive tsü eno Israel lo lhothemi pithive tsüe.

³² Ikeghi panongu no itaghi axine shi auve; Paw akümzapu kümla ithuluve keghi, panongu no pülümoe.

³³ Ikehu Pa no pano tsala pesü atuthukishe toi hauvepe eno shithüghüikeu lono pano küxü mpe puwove tsüe.

³⁴ Kughou Pa no khami pithive keno, panongu no Pa phuighi; Panongu no xaide no amlo tsüqhiyi Alhou phuighie.

³⁵ Alhou, Shishe Akiqheu ye pano sükusho tuqu, pano xachilekuluu kepi panongu no kümsülue.

³⁶ Ikemu pano tsapi ye akimki likhi; panongu no pikeu lakhimu kuchou shimoe.

³⁷ Panongu mlo ye Pa lau akumto shimoe; panongu ye Paw puloshoqhi lo pükhükulu shimove.

³⁸ Ikemu Pa no kimiyeqhiyi kehu panoqo xine qhukimthe tsüno panoqo kütsave moe; Pa no ghuthu kutomo Pa mlo kighide ghasüve eno Pa loghu kümtsü pephe moe.

³⁹ Pa no kümsülu keu no panongu ye thiveni kemi, mülhü ighi no ideighi moveke paphie.

⁴⁰ Panongu ye yenguyike-a lo ghuthu khije Pa hebide eno asayeli lo Pa mlo ghujuve tsü kela!

⁴¹ Anguno anguno panongu no Alhou ghukeju ke, eno Israelmiw Akimtheu mlo ghimepu süghike.

⁴² Panongu ye Pa küka momu aghümi launo Pa no panoqo qhüchilelu keu kümsümave,

⁴³ Pa no Egypt lo amchipuqo eno Paw akümzapu kümla Zoan luza lo shikeu kümsümave.

⁴⁴ Pa no pano ghokiqo pesü aji kughulhove tsü, ikehu panongu ye pano ghokiqo lo azü yemlave.

⁴⁵ Pa no amiyi loji panongu lau puwu no tsaqhipe, eno achuyi puwu, tipaqo no panongu kütsave ke.

⁴⁶ Pa no tülhaqu puwu no pano xaboqo chuvepe eno aghime xathi ye tülhaqu no chukhave peke.

⁴⁷ Pa no mürasü pesü pano tsaiboqo kütsavepe, eno avütsa no panow tüküthibo küghaqhipe.

⁴⁸ Pa no mürasü eno tsütsüpha pesü pano tsüaqu eno ambe loji pithive tsü.

⁴⁹ Pa no amlo kighide, aloghu, axukighide, eno aghime küsa pesü kütsakungo chekeu kungumi launo puwue.

⁵⁰ Pa no Pa xukighide ghenguno alaghi kuto; Pa ye akithi lono panoqo püxü moe, ikemu panoqo küxü pesü püsa lo ikhiphe tsüve.

⁵¹ Ham phiki lo pano kumto xüthi amsüu, Egypt lo anoghiu kümtsü Pa no pithive tsü.

⁵² Tithiu Pa no Paw timiqo ambe toi saphe sawu eno yenguyike-a lo ambe loji toi ala kiche sasü wuve.

⁵³ Pa no kutokupui panoqo sawu kehu panongu ye msave moe, ikemu azüghi no pano ghümi pütsüqhive.

⁵⁴ Pa no panoqo sasü Paw akimthe yeghi, naghuto khikhi Pa kumto pesü tolu keno tilau sawue.

⁵⁵ Pa no panoqo zülono shiyeqo hapheve tsü; Pa no amheghi panoqo sala kutotsü eno Israel shiayeqo pelo pano phiki lo küghüna luvepe.

⁵⁶ Ikeghi panongu no Shishe Akiqheu Lhou hebide eno Pa peju no Pa yezah papemoe,

⁵⁷ pano puasü toi idewove eno amikucho kumo shive; panongu ye apiji kughuho toi pükhübe mlae.

⁵⁸ Kughengu panongu no pano lhou pesü Pa xukutho ke; pano julho kümlla huno Pa pelo anheshuve peke.

⁵⁹ Alhou no ti chilu kelo, Pa ye aloghu no chhitoive, eno Pa no Israel milive.

⁶⁰ Pa no Shiloh lo Pa kungo-a qhive, Pa ye tile Paw timiqo gholo acheke,

⁶¹ Pa no Puloshoqhi bohu Pa kimthe juküvü eno Pa küka hu, ni ghümi u lo phesüve tsü.

⁶² Pa no Paw timiqo pesü azütakikihi lo phesüve tsü eno Pa loghu Paw timi shou puwu.

⁶³ Ami no panow lhothemiqo pitiqhive, ikehu panow lhothelimi ye külakupu le phemove.

⁶⁴ Pano chinemi ghi azütakikihi lono ikiqive, eno chimemi no mloqa moe.

⁶⁵ Tithiu Ampeu no zü apüzü ithughi keshi ilhethughi; timi akumtomi lakhi aji shove no ighamku akeshive.

⁶⁶ Eno Pa no pa ghümiqo haleve; Pa no panoqo pesü lhokta kukujopu lo süve.

⁶⁷ Pa no Joseph phiki milive; Pa ye Ephraim shiaye kishe move,

⁶⁸ ikemu Pa no Judah shiaye kisheluve Pa no kimiye chekeu Zion Toghi kisheluve.

⁶⁹ Pa no kungugha lo toi Pa kimthe-a mla, alholo ghenguno ayeghi ghope qhike toi Pa no ti iqhikumtoe.

⁷⁰ Pa no Pa qeu David kishe ambe loji lono pa ikhiphelu;

⁷¹ ambequ ati pape cheke lono Pa no pa pelo Jacob, Paw timi, Israel, Pa mheghi khekuto peniye saghike.

⁷² Amlo müzüchoi shino pa no panoqo khekuto eno shitsashi panoqo sapheke.