LESHELE 77 - Sumi Naga CL (Re-edited) Bible (BSI)

I Veküsa lo I no Ampeu Phuwue

Asaphw Leshele

¹ I no Alhou lau ighamku, Alhou lau ighamku, Pa no chilutsü nani.

² I veküsa tsala lo I no Ampeu phuwue; I no qeive mono puthotsü I u sükhope inikhue; I ngulho no alokughuno shinike mili auve.

³ Kughou I no Alhou kümsülu keno I no mloqae; I no kümsüputho kelo, I ghungu no aghüthi süve;

⁴ Pa no I pelo zühupe moe; ni ye shishe shisave kehu atsa pimlavae.

⁵ I no wovekeu tsalaqo eno khaghi mpeqo kümsüjue.

⁶ I no pi, “Putho lo I pelo I le kümsülu pelo; I pelo I mlo lono kümsüputho pelo.” Tileno I ghungu no aghüthi küxü shi phujue:

⁷ “Ampeu ye alholo mili auve no khilemu amloqi kithe move nani keshea?

⁸ Paw iqemokeu kikimiye ye alholo kishekhave akeshea? Paw pikiqhitsa ye alhokuthu ghenguno tave akeshea?

⁹ Alhou ye küpüqhiyi keu kümsümave akeshea? Pa ye amlo kighide lono Paw kikimiye lakhave akeshea?”

¹⁰ I no pi, “Shishe Akiqheu u ajeu no I mlo kighishi kilive tsüae.”

¹¹ I no Ampeu kümla kümsüchile luni; iyei, I no wovekeu lo Ow akümzapu kümlaqo kümsü luni.

¹² O kümla kümtsü I no kümsükuto juni, eno Ow akümzapu kümlaqo kümsüputho juni.

¹³ O Alhou, O laghi ye akimthe ke. Khuno lhou no ni Lhou toi kije kea?

¹⁴ No ye akümzapu shiche keu Lhou ke; Nono timiqo gholo o kumto pephe piyeke.

¹⁵ O küka vecheo Nono Jacob ngo Joseph nuli Ow timiqo qhüchile lue.

¹⁶ O Alhou, kughou azüghi no No ithulu keno tino msave; mtsüqheino azüghi kutho no khokho shive.

¹⁷ Khüngküsü no tsütsüghu ghuqhi; atsütsü lono tsütsüsüe; O pijiqo no ako kümtsü lono kulophapha shike.

¹⁸ Ow tsütsüküsü no fukichighi mülhü lo ae; Ow tsütsüpha kukulo no ayeghiqha yepüvüe; ayeghiqha no khokhoshi ithae.

¹⁹ O laghi no azüghi katha wue, O laghi no azüghi kije kathae; ikeghi O pukhu nepa ithumlae.

²⁰ Moses ngo Aaron pama u vecheo Nono ambeloji toi Ow timiqo sawue.