LESHELE 76 - Sumi Naga CL (Re-edited) Bible (BSI)

Khuu no O Zülo Puthugho luni Kea?

Asaphw Leshele

¹ Judah lo Alhou ithi ani; Israel lo Pa je ye kije ke.

² Pa ki ye Salem lo shipüani, Pa kungo-a ye Zion lo ani.

³ Tilau no Pa no kulophapha keu piji, azüto, azüta eno aghükishi nanu hephove tsü.

⁴ Naghuto lo alichhe chhitoi akeu nguno ajuküvüpu eno kükanguagha alau akeu ye Noke.

⁵ Aghütomi no hakholu keu kümtsü luve tsüe; panongu ye akithi küzü züani; ghüshimi kümtsü no pano phiau peitha mlavae.

⁶ O Jacob Lhou, Nono panoqo lomipive aye, khurshi ngo khurshimi ghi akichiqhipe ngove cheni.

⁷ Ikemu No ye sümsa kepue! Kughou O loghu ghuthu lakhi ipeghini keno khuu no O zülo puthugho luni kea?

⁸ Kungugha lono Nono küghakütha shuphe; ayeghi no msa khokhoshi eno iqünheive,

⁹ Alhou no ithughi eno küghakütha shuphe ayeghi lo aqhokighemi kümtsü xalu niye ke.

¹⁰ Mtsüqheino O loghu ighikeu lono timi no O sheqhe nani; eno aloghu lono ghükulumi ye ghasü-hasü luve cheni.

¹¹ Ampeu O Lhou vilo kiu shinie pi püani keno shilo; akupunu lo akeqo pelo khuu sümsa masa keno Pa lau agho süghi pelo,

¹² Pa no kükapumi kuchunive eno kükami shithüghüi cheni.