LESHELE 74 - Sumi Naga CL (Re-edited) Bible (BSI)

O Alhou, Ithu no Süsho lo

Asaph Le

¹ O Alhou, No ye kushiye alholo ni hapupove ani kea? Kushiye O tsüni kümtsha-a lo ambeqo shou amloide ani kea?

² Ow timi, Nono khaghi no qhüluve keqo, O mheghi shiaye shiniye qhüchile luve keqo kümsülu lo! Zion toghi, khile Nono ache keno ti kümsülu lo.

³ Ixapinyi akeqo shou chewu julo; Aghümi no akimthe-a lo thokha kümtsü kütsave tsüae!

⁴ O ghümi no O sasü kuposhu chekeu-a lono pükhübide ighae; panongu no michiluve niye amchipuqo peqhepe qhike.

⁵ Panongu ye aghasü lo asübo yeqhi nike amüghü kipemi toike.

⁶ Tile aye shisü keu asü lüpa kümtsü panongu no azüta ngo ayihesü pesü ghiphove tsüe.

⁷ Panongu no O chineki lo ami süvetsü; O je achekeu ki shikitiqeve, eno ayeghi lo xaleqhive tsüe.

⁸ Panongu dolono pi, “Nino qhoi panongu qhasü luveni”; aghakhu lo Alhou kümlla-a kümtsü panongu no pitive tsüe.

⁹ Ningu ye ni michipu ithumlavae; tungkupmi lakhimu kühavae, khitohi tishi nani keno khunomu mthae.

¹⁰ O Alhou, aghümi ye khitohi jukünatha anani kea? Aghümi no alholo O je pipütha apeni keshea?

¹¹ Kushiye No ye O u ajeu süchile luve ani kea? O u kumshope akeu ikhiphe luve no panoqo kütsave lo!

¹² Ikemu Alhou I kükau ye abothu lono ke, eno ayeghi lo xakulu süghi tsüe.

¹³ O küka kumto lono Nono azüghi kijethave; Nono azüghi lo ghasükümla ghawu boghe hepho tsüke.

¹⁴ Nono Leviathan kütsü ghapho tsüke; eno tipau pesü yenguyike-a lo tüghashiqo chuqupu shitsüe.

¹⁵ Nono azüpuki eno aghokitiqo vephetsü; Nono qotamo keu ghoki pelo qhaivepe.

¹⁶ Tsüküvü tsüküzü tsala ghi Ow; Nono atsütsü lo aküvü eno khetsünhe ghope qhike.

¹⁷ Nono ayeghi lo alughi kümtsü kughupe qhi, Nono mütsü eno süsü tusho lhotsüe.

¹⁸ O Ampeu, aghümi no kishi O junu ani, eno mbomzümi no O je thaigha ani keno kümsülu lo.

¹⁹ Ow timi ivünhei kemi pesü tüghashi tsüve kevilo; Ow timi athokhami alholo kümsümave tsü kevilo.

²⁰ Puloshoqhi gihu tsülo, kughengu ayeghi lo aküzü-a kümtsü lo hekiqhi no chhitoi ani.

²¹ Nedaqoda pesü akeqo pelo akukujo lo idewope kevilo; athokhami eno aveküsami pelo O je sheqhe pelo.

²² Ithulo, O Alhou, O kimji süsholu lo; mbomzümi no atsala kupuju kishi o thogha keno kümsülu lo!

²³ O ghümi no ighamku keu kümsümave kevilo, O hekibidemi no tamono igha akeu kümsüma kevilo!