LESHELE 73 - Sumi Naga CL (Re-edited) Bible (BSI)

Kaku Aküthüu Alhou ye Alholo I Kumto

Asaphw Leshele

¹ Alhou ye kuchou no Israel lau eno amlo mqhamqhi kemi lau akivi shicheni!

² Ikemu I ghengu ye I pukhu küpxa luveni cheghi; I pukhune no nekiphepe veqhiveni cheghi.

³ Kughengu kughou I no kixikilami küakini ithulu keno ni ye aqheküzami jumineve.

⁴ Kughengu thive moke kutolo panongu ye aghime küha; pano phimpi ye atha pubeyi eno mtotoi ke.

⁵ Kütami toi panongu ye aküpüna kühae; timi kütami toi panongu ye imeju chemoe.

⁶ Ikehu aqheküza no pano chiku; hekiqhi no pano phimini shicheni.

⁷ Atha kupu no pano nhethi ye shengulei ipeghi; panoqo mlo ye mbomzü no qole-qole acheni.

⁸ Panongu no thogha eno axeküsü tsa picheni; tsütsüngoju ghi kütami qhasüni ye shikichi cheni.

⁹ Panongu no akichi xükhope kungugha pipüsa, eno pano mili no ayeghiqha kuchopu itsü acheni.

¹⁰ Tighenguno timiqou ghi pano lau ideighi no panongu no pikeu pülüve cheni.

¹¹ Panongu no pi, “Alhou ye kishi no ithini kea? Shishe Akiqheu ye akighithi ani keshea?”

¹² Julo, hipaqo ye kixikilami ke; alhokuthu ililai eno küakini kughuko acheni.

¹³ I no I mlo akimthe shipe qhikeu eno akipimi küha keu shi I u mütsüve keu kümtsü adou shivae.

¹⁴ Kughengu atsala kupuju I ghimeqhi eno inaqhe atsütsü alomipi ke.

¹⁵ I no, “Ni ye ishi pini,” ipi aye, ni ye o nuliqo tiqheli pishiqhive aghini cheke.

¹⁶ Ikemu kughou I no hi vethalu kepushi kümsüju keno, I ghenguno kushokütsü shive,

¹⁷ tileno I no Alhou kimthe-a lo iloju kelo; pano shekuho ye kiu toive nani keno I no kimchilue.

¹⁸ Kuchou no Nono panoqo pesü phephei ke-a lo qhive; Nono pano pelo ikiqi kütsavepe.

¹⁹ Panongu ye kishi paikhavi lono kütsave kea, aküighüpu no qhoi jolepe wuvae!

²⁰ Timi no asamo pumo ake lono idathughi keshi, O Ampeu, kughou Nono ithughini keno, panoqo ye hauve nani.

²¹ Kughou I ngulho no kukhukimji shi akeno, I mlo no ghüza pesü akelo,

²² ni ye izüvui eno mthave; ni ye O zülo tüghashi toive.

²³ Ikeghi, ni ye alhokuthu O gholo ani; Nono I u ajeu mtupe ani.

²⁴ Ow mijekütsü no I la kichetsü, eno ashekha lo Nono ajuküvü lono I saluve nani.

²⁵ Ikemu No kumo aye kungugha lo ni ye khuu ani kea? Eno O nguno alau ni ye ayeghi lo mine kepu kühae.

²⁶ I phiashi eno I mlo ye tomlave luvi, ikemu Alhou no I mlo kumto eno alholo I mheghi ke.

²⁷ Kughengu O launo putosü lo akemi ye pühave nani; O pükhü kümlami kümtsü Nono kishekhave tsü nani.

²⁸ Ikemu I ghengu ye Alhou phivilo ngolu keu pavie; ni ye Ampeu Alhou pesü Iw sükusho shivae, tishikeu lono I no O kümla ghili pini.