LESHELE 72 - Sumi Naga CL (Re-edited) Bible (BSI)

Ow Kuchou Xakütha Akükau Tsülo

Solomon Le

¹ O Alhou, Ow kuchou xakütha pesü akükau tsülo, eno O chipiu mikucho pesü akükau nu tsülo.

² Pa pelo achipiu mikucho pesü Ow timiqo, eno kuchou xakütha pesü kumlhomi xatha tsü pelo!

³ Timiqo ghenguno naghuto pelo kinikülü shi ipeghi pelo, eno atoghi pelo achipiu mikucho xathi pithi pelo

⁴ Pa pelo kumlhomi chipiu süsho tsü kemi shipelo, aveküsami nuliqo xaphelu pelo, eno qhaküsümi qodaqhi pelo!

⁵ Panongu pelo khetsünhe ake tivilo eno, tiqheli kupuju lo aqhi ake tivilo O sümsa pelo!

⁶ Pa pelo atsüni kümtsha lo tsütsüghu ghuqhi aketoi eno ayeghi shou ghuqhi aketoi pelo!

⁷ Pa ghuloki lono amikuchomi pelo ikowolu pelo, eno atsütsü lo aqhi kühave moke kutolo aloino apelo!

⁸ Pa kükaqha ye azüghi lono azüghi kutolo apelo, eno Aghoki lono ayeghi shekha kutolo apelo!

⁹ Asayeli lo shiayeqo no pa zülo qhoqhünhe pelo, eno pa ghümi no ayeghimkhu damine pelo!

¹⁰ Tarshish lo kükami eno azüghimkü lo küxümi no sükusho süqha pa tsü pelo; Sheba eno Seba lo kükami pelo agho peighi pelo!

¹¹ Kükami kümtsü pelo pa zülo qhoqhünhe pelo, eno shiye kümtsü pelo pa qe pelo!

¹² Kughengu kughou aveküsami ngo kumlhomi eno akukuphu küha kemi no pa ku keno pa no xalue.

¹³ Pa no miqemlei eno aveküsami kimiye cheni, eno aveküsami küxü xalu cheni.

¹⁴ Qodaqhi eno hekiqhi lono Pa no panoqo küxü qhüchilelu, Pa nhethe lo panoqo ji ye akughupu ke.

¹⁵ Pa pelo axüshu pelo; Sheba meshoyi pa tsü peniu! Pa ghenguno tamono akighini shi apeniu, atsala kupuju pa ghenguno kükümgha inikhu tsü apeniu!

¹⁶ Ayeghi lo athi kupukuno shi apeniu; tipaqo no naghuto kütsüqa lo fuküghütha apelo; Lebanon lo xathi toi peniu; eno aluza lo atsüni kümtsha toi mishighünaqo lo timi pelo ikoishe lupelo!

¹⁷ Alholo pa je ye kümsümave mono ache pelo, atsütsü lo khetsünhe ake kutolo pa jekipi apelo! Pa vecheo timiqo no müghalu pelo, shiye kümtsü no kükümghau ipi pa ku pelo!

¹⁸ Ampeu, Israel Lhou sheqhelo, Pa likhi no akümzapu thimeqo shi cheni.

¹⁹ Alhokupuju Pa juküvü je sheqhelo; ayeghi kümtsü Pa juküvü no chhitoi pelo! Amen, Amen!

²⁰ Jesse nu, David kighini ye ashekha shivae.