LESHELE 71 - Sumi Naga CL (Re-edited) Bible (BSI)

I no Lhove kelo I Qhive Kevilo

¹ O Ampeu, I no O lau sükusho lucheni; khilemu akukujo lo I phesüve kevilo!

² O chipiu mikucho lono I xalu eno I kuphu tsülo; O kini I lau kugho puwo tsülo, eno I xalulo!

³ I ghenguno sükusho tuqu shitsü lo, tipau lau I no alhokuthu ighini, Nono I xalu peniye azah tsüvae, kughengu No ye I tuqu eno I sükusho liwo ke.

⁴ O I Lhou, kixikilami u lono, achipi kumomi eno ayiküsami küka lono I xalulo.

⁵ Kughengu, O Ampeu, No ye Iw lajupu, I lhothe lono I no pükhü chekeu ke, O Ampeu.

⁶ I punu mphi lono ni ye O shou mungu ighivae; I za tita lono ni ikhilu keu huye No ke. I no tave mono O sheqhe ani.

⁷ Timi kutomo zülo I küxü no kichekipiye shivae, No ye I no ijekulupu liwo ke.

⁸ I kichi lo O shekiqhe no chhitoi, atsala kupuju O juküvü shekiqhe likhi ani.

⁹ I no kitemi shive kelo I hapupove kevilo; I kumto hauve kelo I pheve kevilo.

¹⁰ Kughengu I ghümi no I shikichi ani; I küxü phuche kemi no kümtsa kuchughu küqha

¹¹ eno pi, “Alhou ye pa phevae; pa hawu no küghaluve lo, kughengu pa xaluni kemi kühae.”

¹² O Alhou, I launo putosü kevilo; O I Lhou, I kuphu kepushi mighi lo!

¹³ I nguku akeqo pelo kujove eno pühave pelo; I ghüza niye akemi pelo atiche shive no kujove pelo.

¹⁴ Ikemu ni ye tamono pükhüni eno alau eno alau O sheqheni.

¹⁵ I kichi no O mikucho kümlaqo sheshuni, atsala kupuju Ow xakulu kümlaqo pini, kughengu tipaqo ye I kighithi nguno alau kihikhamla keu ke.

¹⁶ I no Ampeu Alhouw akughushu kümlaqo pesü pini; O chipiu mikucho pesü I no panoqo ghutuni.

¹⁷ O Alhou, I lhothe ghuloki lono Nono I shika ighivae, eno Ow akümzapu kümlaqo I no sheshu aphie.

¹⁸ Ikehu I no kitemi shive no asa mpave namu O küka pesü ighini keu tiqhelimi vilo sheshulu moke kutolo I pheve kevilo, O Alhou.

¹⁹ O Alhou, O chipiu mikucho ye kungugha kutolo to ani. No khuu thime kije mlave akeno, O Alhou, O toike khuu ania?

²⁰ No khuu I pelo aveküsa eno amhekiqi ithulupe keno Nono I püxü kithe tsü nani; ayeghi kuthoku lono Nono itaghi I saipeghi nani.

²¹ Nono I pelo ikoishe lupe nani eno itaghi I lokughuno tsü nani.

²² O I Lhou, O pükhükulu ghenguno I no akighilebo pesü O sheqheni. O Akimtheu, Israel Lhou, I no küghaküsü lebo pesü O shipilini.

²³ Kughou I no O sheqheni keno, I kichi no alokivi shi ighamkuni; I ngulho, Nono qhüchilelu keu no O sheqheni.

²⁴ Atsala kupuju I mili no O kukuphu ghili pi anani, Kughengu khunono I ghüza niye phuche keno panongu ye akukujo lo ilovae eno aghüthi süvae.