LESHELE 7 - Sumi Naga CL (Re-edited) Bible (BSI)

O lau I no Ijelu Cheni

David Le

¹ O Ampeu I Lhou, I no No ije cheni; I hache kemi kümtsü launo I xalu eno xaphe tsülo,

² tikumo aye abongshuu toi panongu no I sütha pinyi aleqhi shive no khumu I xalumo nani.

³ O Ampeu I Lhou, tsala I no hipau shive aghi, tsala I u lo akumou aghi aye,

⁴ tsala I no küsakügha pesü I küsau lochile püaghi, momu kütsazü lono I ghümi xüle puwuve aghi aye,

⁵ I ghümi pelo hasü ighi no küghaluve pelo, pa pelo I küxü ayeghi lo neda qodave pelo eno I jekipi pesü ayeghimkhu lo qhivetsü pelo.

⁶ O mlo kighide lono ithulo, O Ampeu; I ghümi loghu shou puthugho lo; I ghenguno ithulo; kuchou xakütha shitsü lo.

⁷ Ashiayeqo pelo O vehope ngo pelo; eno kunguu no pano shou ayepelo.

⁸ Ampeu no ashiayeqo shou xatha cheni; O Ampeu, I mikucho kiqi lono, eno I lolo akikhi akeu kiqi lono I shou küghatha lo.

⁹ O amikucho Lhou, khuu akükümsü eno amlo lheju cheni keno, kixikilami kümla lhoksa kishekhave tsülo, eno amikuchomi xaqhe tsülo.

¹⁰ I züto ye Alhou gholo ani, Pa no amlo lo müzüchoi kemi xalu cheni.

¹¹ Alhou ye amikucho xaküthau, Pa ye tsalakipe alhoksa shou axuide chekeu Lhou ke.

¹² Timi no xaidemo aye Alhou ye Pa zütakikihi chighiuve cheni; Pa ye Paw shexilika piqepe kutoluve cheni;

¹³ Akithipu ghünanu Pa ghenguno kutope ani, Pa miküiqü piji kutoluve cheni.

¹⁴ Julo, kixikilami ye alhoksa mishipu cheni, pishikiqhi mishipu cheni, eno akimki punuqhi cheni.

¹⁵ Pa no aqo chhupe qhicheni, eno pau no tile ikiqi ilove cheni.

¹⁶ Paw pishikiqhi no pa kütsü shou ikughi cheni, eno paw ngukangugha no pa boghe shou ikughive cheni.

¹⁷ Ampeu mikucho ghenguno I no shikimthi tsüni, eno I no Shishe Akiqheu Mpeu lau shekiqhe le pheni.