LESHELE 69 - Sumi Naga CL (Re-edited) Bible (BSI)

I Xalulo, O Alhou

David Le

¹ I xalulo, O Alhou! Kughengu azü no I kuo kutolo ikughivae.

² Ni ye aniba thonheike-a lo apukhu kinepu kühano ilo cheae; ni ye azükutho lo iloghivae, eno züqozü no I vesüvae.

³ I ghügha no ni ye lhovae; I kughoki no qhaivae. I Lhou ngokhe keu huno I nhethi ye chuchumiyivae.

⁴ Kütsazü shi I mithi chekemi no I kütsüsa nguno akichiu ani; akimki lono I ghüzani ye akemi, I kütsani ye akemi ye akumtomi ke. I no püka lumomu ni ye itehi ti lochileve masa keshea?

⁵ O Alhou, Nono I ghüzü ithi ani; I no akumou shive keqo ye O launo küsü püamoe.

⁶ I vecheo O pükhü chekemi pelo kujovepe kevilo, O Ampeu, aqokitikhi Lhou; I vecheo O phuche kemi pelo ajuaje küsa shivepe kevilo, O Israel Lhou.

⁷ Kughengu O je ghenguno ni ye atiche puqhe püani, akukujo no I gi küzü luvae.

⁸ Ni ye I thiküzümi gholo shoinami lakhi shivae, ni ye I za nuliqo lau inaghami lakhi shivae.

⁹ Kughengu O ki ghenguno müamzü keu no I pitipüza, O thogha kemiw thokügha no I shou ikughivae.

¹⁰ Kughou I no kümvü ghi qa eno kuchuni keno, tipau no I thaigha keu shive.

¹¹ Kughou I no yeqhiyephi pepu keno, panoqo zülo ni ye küghakichepu shive.

¹² Khagho lo akeqo zülo I ghili kügha keu shive, eno shokümzümi no I ghili pesü ale iqi no pheke.

¹³ Ikemu ni ye O lau I kighini peighi ani, O Ampeu. O Alhou, ikhikulupu dokivi lono Ow iqemokeu kikimiye eno thebei xakulupu akeu lono I khochile tsülo.

¹⁴ Aniba lo ilo chekeu lono I xaphe lulo; I ghümi launo eno azü kutho lono I xaphe luvelo.

¹⁵ Züqozü no I vesüvepe kevi, akuthoku no I munovepe kevi, momu aqo lo ilovepe kevilo.

¹⁶ I khochile lo, O Ampeu, kughengu Ow iqemokeu kikimiye ye aloe; Ow kupukuno kimiyeqhiyi keu kiqi lono I lau igho ighilo.

¹⁷ O qeu launo O gi küsü kevilo; kughengu ni ye aghime küsa lo ani; mtazü I khochile lo.

¹⁸ I ngulho lau kupunu ighilo, I xaphe lulo; I ghümi launo I xaphe tsülo!

¹⁹ I pipütha keu, I kukujo eno I gihumo keu Nono ithi ani; I ghümi kümtsü Nono ithi ani.

²⁰ Piküptha no I mlo hepho tsü kehu ni ye amlo ghuju shi ani. Küpüqhiyi tsü peniye I no laju, ikemu khumu aghi moe, alokughuno tsü peniye kemu khumu ithumlae.

²¹ Achuqupu theli lo tüghü I tsü, eno I tüghü lo panongu no akiqhi ji sho peniye I tsüe.

²² Panoqo zülo aghulhu lüpa no alichhe shive pelo; eno panongu no aloino akelo, tino alichhe shive pelo.

²³ Pano nhethi züve no ithumlave pelo, eno pano yikughi no alhokuthu khokho shive pelo.

²⁴ Pano shou O loghu lepuku lo, eno O mlo kighide iqü akeu no panoqo haluve pelo.

²⁵ Pano ghazü ye küghüve pelo; pano phiki lo khuu pelomu ngo lupe kevilo.

²⁶ Kughengu panongu ye Nono ghüza püakeu pishipuju ke, eno Nono ghüza püa keqo ghime ghili kügha acheni.

²⁷ Aghime shou aghime pesü panoqo shou veqabe tsülo; panongu pelo O launo akipimi qhikütsü ithulupe kevilo.

²⁸ Küxümi kaku lono pano je ye nuxave tsülo; amikuchomi gholo pano je sütsü kevilo.

²⁹ Ikemu ni ye aghime shi ani eno aküsü lo ani; O Alhou, Ow xakulu no qhemghai I süqhe tsülo!

³⁰ I no ale lakhi phepe Alhou sheqheni; I no shikimthikütsü pesü Pa jepipi tsüni.

³¹ Hi no amshitsü momu amishi lhothe kuchopu pesü mlla akeu nguno akiviu ke.

³² Kughou aqhokighemi no ti ithuluni keno alovi nani; khuu no Alhou phucheni keno nongu mlo püxü kithelo.

³³ Kughengu Ampeu no aveküsami tsa ini tsü cheni eno Paw timi akughumi jukünathave chemoe.

³⁴ Atsütsü eno ayeghi, azüghi eno tile lhoxü kümtsü no Pa sheqhelo.

³⁵ Kughengu Alhou no Zion xalu nani eno Judah mishighünaqo shiqhe tsü nani, timiqo no tile küghüna eno amheghi shiluve nani;

³⁶ Pa qemi tianuli no tipaqo ighi luve nani, eno Pa je kimiye chekemi no tile küghüna nani.