LESHELE 68 - Sumi Naga CL (Re-edited) Bible (BSI)

Alhou no Pa Ghümi Haleve nani

Davidw Leshele

¹ Alhou no ithughi nani, Pa ghümi kuthole nani; khunono Pa mithi cheni keno Pa zülono pove nani!

² Amchhi fusawuve ketoi, nongu no panoqo haleve nani; ami phivilo aghügha no mlave keshi, kixikilami ye Alhou zülono hauve nani!

³ Ikemu amikuchomi ye alovi nani; panongu no Alhou zülo shishe alovi nani; panongu no alovi ighamku nani!

⁴ Alhou lau ale phelo, Pa je shipili ale phelo; khuu asayeqha lo checheni keno Pa lau ale phelo; Pa je ye Ampeu ke; Pa zülo alovilo!

⁵ Mighimi papu eno chimemi sükushou ye Alhou, Pa kimthe kungo-a lo ani.

⁶ Alhou no thilimi pelo akibo lo xülupe; Pa no akughumi sasü kinikülü lalo saipeghi, ikemu hekibidemi ye qhaike yeghi lo küghüna peke.

⁷ O Alhou, kughou Nono Ow timiqo zülo chewu keno, kughou Nono asayeqha kathawu keno,

⁸ Sinai lo Alhou, Israel Lhou, zülo ayeghi no itha, atsütsü no tsütsüghu ghuqhie.

⁹ O Alhou, Nono pofushi tsüghuqhi tsüe; O mheghi no qhai-ghoi akelo Nono athoputho tsüe.

¹⁰ O mbeloji no tile küghüna kepu-a ithulue; O Alhou, O kivi lono Nono aveküsami kuphu tsüe.

¹¹ Ampeu no azah tsü; asütsa pesü sheshu kemi totimiqo ye aqokitikhi kije ke:

¹² “Ghüshimi kükami—panoqo ye povae, pokhavae!” Totimi aki lo akeqo no hakhokulu thime kije luvae.

¹³ Apumiqo no ambeloji dolo ikiqi ihozü anamu, miqhedu chishibo ghükayi no küzüpe akeshi, eno pa mhi no ameshoyi akiviu no küzüpe aketoi ke.

¹⁴ Kughou Akughushuu no kükami tile haleni keno, mürasü no Zalmon shou qipuku aketoi ke.

¹⁵ O Alhouw naghuto, Bashan naghuto; O atoghi kutomo akeu naghuto, Bashan naghuto!

¹⁶ Alhou no Paw timi kungo-a shipenike kümsü akeu naghuto shou, iyei, Ampeu no tile alholo acheni, O atoghi kutomo akeu naghuto, kushiye no ye kimthikile ti ju ani kea?

¹⁷ Alhouw khurkulu ye qhethonhe chighi no ghuthu kini, qhethonhe no qhethonhe ani; Ampeu no tipaqo gholo ani; itehi Sinai ye akimthe-a shivae.

¹⁸ Nono qhemghai ke-a lo iku, akughumi aqokitikhi sasü O gholo shekujo sawu eno timiqo launo agho ikhilu, hekibidemi lau ghi, tishino No Ampeu Alhou no ngoniye shike.

¹⁹ Ampeu sheqhelo, Pa no tsalakipe ni makho putsü cheni; Alhou ye ni xakuluu ke.

²⁰ Ni Lhou ye xakulu Lhou ke, akithi lono xalu chekeu ye Ampeu, Alhou lau ani.

²¹ Ikemu akipimi laghi lo kicheu, Alhou no Pa ghümi boghe lo ghapuku tsü nani.

²² Ampeu no pi, “I no Bashan lono panoqo sachile ighi nani, I no azüghi kutho lono panoqo sachile ighi nani,

²³ tishianguno panoqo ji lo nongu no apukhu nesü peni, now atsüqo pelo aghümi ji mine penie.”

²⁴ O Alhou, Nono shekujo chekeu ithuluvae, I Lhou, I kükau no shekujo ala chesü akimthe-a lo ilovae—

²⁵ alephemi no azüu shi, alebo küigha kemi no ashekhau shi, pano mta lo ilimiqo no amqübo küighae:

²⁶ “O nongu Israel züpuki lono ipeghi keqo, ahoho kije lono Ampeu Alhou sheqhelo!”

²⁷ Benjaminmi, panoqo dolo aghulou no azüu shi saphesü cheni, Judah sakiphemi, Zebulun sakiphemi, Naphtali sakiphemi ye aqokitikhi gholo ani.

²⁸ O Alhou, aküka khipau vecheo Nono ni ghenguno mla keno O küka ti kusülo, O Alhou.

²⁹ Jerusalem lo O chineki ghenguno kükami no agho O lau xapughi nani.

³⁰ Tüghashi ayeghübo dolo akeqo sakiyi lo, amshitsü loji timi mishiti gholo akeqo sakiyi lo. Khunono asüqha mine cheni keno apukhu no pano qodave lo; khunono aghüshi lo azüvü cheni keno panoqo haleve lo.

³¹ Egypt lono aküxü kivimi ighi nani; Cush no akimighi shi Alhou lau li u süqhe nani.

³² O ayeghi lo kükaqhaqo, Alhou lau ale phelo; Ampeu lau shekiqhe le phelo,

³³ Mulhou tsütsü lo cheche keu julo, Pa no asütsa, akughushu sütsa puwue.

³⁴ Alhou küka sheqhelo, Pa küka kughushu ye Israel shou ani, eno Pa küka ye atsütsü lo ani.

³⁵ Alhou ye Pa kimthe-a lo akichiqhipue; Israel Lhou, aküka eno akumto tsükeu huye Pa ke. Alhou shelo!