LESHELE 66 - Sumi Naga CL (Re-edited) Bible (BSI)

O Kümla ye Kishi Akümzapu Kela

¹ Ayeghi kümtsü no alokivi lono Alhou lau ighamku lo;

² Pa je kipipu shipili lo; ajuküvü shekiqhe Pa tsülo!

³ Alhou vilo pilo, “O kümlaqo ye kishi akümzapu kela! O küka ye ighono kije kehu O ghümi no itsaqi O lau ighie.

⁴ Ayeghiqha kümtsü no O mlla eno O lau shekiqhe le phe; panongu no O je shipili ke.”

⁵ Alhou no kiu mlave tsü akeno ighi no julo: timi nuliqo lau Pa no mla tsükeu ye akümzapu ke.

⁶ Pa no azüghi pesü qhaike yeghi kughulhove tsü: panongu no apukhu lono azüghi kathawu ke. Tile ningu no Pa gholono alovie,

⁷ Pa no Pa kumto lono alhokupuju ayepe cheni, Pa nhethi no shiyeqo shou jupuku cheni— hekibidemi pelo pano ampi süqhe ape kevilo.

⁸ Ni Lhou sheqhelo, O ashiayeqo, Pa shekiqhe sütsa chilu pelo,

⁹ Pa no ni ngulho pesü küxümi gholo qhitsü eno ni pukhu ye nepiyeve moe.

¹⁰ Kughengu, O Alhou, Nono ningu chhejuvae; ghükayi toi ningu shighuvae.

¹¹ Nono alichhe lo ningu sailoghi; Nono qaqhikeu kho kimshi pesü ni mqa lo betsüe;

¹² Nono panoqo pelo ningu kütsü shou no qoda peke; ningu ye ami eno azü lo ilovae; ikeghi Nono kupukuno-a lo ningu saghi ke.

¹³ I no akipti kümllagho pesü O kilo ighini; O lau I no I shoqhi shikupuni,

¹⁴ ti ye I no aveküsa shi akelono I mütsü lono pikeu eno I kichi no piqhikeu ke.

¹⁵ I no athakupu lhoxü, amshitsü ghakishi shikeu tha pesü akipti kümllagho shi O mllani, I no amshitsü ngo ane pesü akümllagho shi tsüni.

¹⁶ Ighilo eno inilo, nongu Alhou sümsa chekeqo, eno Pa no I ngulho lau kiu mlatsü keno I no pini.

¹⁷ I kichi lono I no Pa lau qae, eno qhemghai Pa sheqhe keu no I mili lo ani.

¹⁸ Tsala I no amlo lo axine qhipüaghi keaye, Ampeu ye initsü moni cheke.

¹⁹ Ikemu kuchou no Alhou no chiluve tsüae; Pa no I kighini sütsa ini tsüe.

²⁰ Alhou sheqhelo, kughengu Pa no I kighini milive tsümoe momu Paw iqemokeu kikimiye I launo süwuve tsümoe!