LESHELE 65 - Sumi Naga CL (Re-edited) Bible (BSI)

Ni Xakuluu Lhou

Davidw Leshele

¹ O Alhou, Zion lono O sheqheni keu ye aküzüpue eno O lau tushokiqhi shikupuni.

² O No khuu akighini chilutsü cheni keno, O lau timi kümtsü no ighi nani.

³ Kughou akipimi no ni mhoqhiveni keno Nono niw hekibide qhukimthe tsü cheni.

⁴ O kungo-a lo ngo penike Nono khuu kishelu eno kupunu saghini keno pano lokivipue! O kilo akivi eno O chineki lo akimthe ghenguno ningu ye aghaqilu nani!

⁵ O ni xakulu Lhou; ayeghi eno azüghi kümtsüw lajupu, Nono akighiche kümla vecheo amikucho pesü ni khochile ke;

⁶ Pa küka lono Pa no naghuto ghope qhike, Pa ye akughushu küka xapu ani;

⁷ Pa no azüghi ghügha, azüghi zü fukucho keu ghügha eno timiqow mbumghu sütsa küghüqü tsü cheni,

⁸ tishi kehu ayeghiqha no O michipuqo jupe akichiqhi ke. Nono kipelau no kulolau kutolo alokivi shi ighamku peke.

⁹ Nono ayeghi xuju no ghuqhitsü; Nono tile küakini kughuko tsü; Alhou ghoki ye azü no chhitoi ani; Nono athi pesü panoqo tsü, kughengu Nono tishi kuto tsüe.

¹⁰ Alu hokideve keu lo Nono ghuqhi tsüno jokümdüve tsü, tsütsüghu pesü vakümtsha tsü, eno tipau thukuu kümghatsüe.

¹¹ Nono kupukuno shi ampe kupuju kümghatsü; kupukuno shi kehu akhokupu khurkulu yeli qole ke.

¹² Yenguyi ke-a lo atsüni kümtsha no pofushi ani, atoghiqo no alokivi shi ani,

¹³ Atsüni-a lo atsüaqu loji no nhakha ani, akhila lo athi no amoqhepe ani, panongu no alokivi lono kümtsa ighamku ale phe ani.