LESHELE 64 - Sumi Naga CL (Re-edited) Bible (BSI)

Kixikilami launo I süsho lulo

David Le

¹ O Alhou, I kumchho lo I sütsa chilu tsülo; aghümi kümsa lono I küxü pükha tsülo.

² Kixikilamiw tuqhou kukughu eno, kixikila shiche kemi aqokitikhi launo I peküsü tsülo,

³ panongu no azütakikihi toi pano mili chighi, panongu no apiji miji aketoi kukhukimji tsa mijipe ani,

⁴ ghüthepe ngo püzü akipimi kükühami lau kapuwo ke, züleno eno msa mono kapuwo pa veke.

⁵ Panongu no kixikila kukughu lo mtotoi tsüqüpe ngoe; panongu no tuqhou no alichhe qhiniye küptsa eno ishi kümsü, “Khuu no panoqo ithuluni kea?”

⁶ Panongu no achipikumo phuju no pi, “Ningu no tsaqütsalei phuju keu phuluvae.” Kughengu timi mlo eno akükümsü alou akeu ye thonhei ke.

⁷ Ikemu Alhou no Pa piji kapuwo panoqo veke; panongu ye züleno izavae.

⁸ Panongu ye kütsavae, pano mili no pano küla ani; panongu ithulu kemi kümtsü no akütsü küngü nani.

⁹ Tithiu timi kümtsü no msave; Alhou no kiu shive akeno panongu no tipa ghili pike eno Pa no kiu mla keno tipau kümsü kutojue.

¹⁰ Amikuchomi pelo Ampeu lau no alovilu pelo eno Pa lau no sükusho lupelo! Amlo lo akikhi xapu akemi kümtsü no sheqhelo!