LESHELE 63 - Sumi Naga CL (Re-edited) Bible (BSI)

Alhou Lajuqhiyi ani

Davidw Leshele. Pa no Judah sayeqha lo chekelo

¹ O Alhou, No ye I Lhou ke; I no puloniqhiyi O phucheni; I ngulho no tüghüthi O laju ani; qhai eno aghime yeghi khile azü küha keno tile akeshi I phi-ashi no thiqhi O laju ani.

² Ikehu ni ye akimthe kilo O küka eno ajuküvü phuighi ke.

³ Ow iqemokeu kikimiye ye aküxü nguno akiviu kehu, I kichi no O sheqhe nani.

⁴ Ikehu I küxü kupuju I no O sheqheni; I no O je lono I u süqheni.

⁵ I ngulho no atha ngo aqü chulu akeshi aghaqilu nani, eno alokivi mütsü pesü I kichi no O sheqhe nani,

⁶ I no I züa lono O kümsülu, eno putho mta lo O lau kümsüputho acheni;

⁷ kughengu Nono I kuphu ighive ake O chishibo qholono I no alovi ale pheni.

⁸ I ngulho no O mtupe ani; I no O u ajeu sünhepe ani.

⁹ Ikemu khunono I küxü kütsave niye phucheni keno pano ye ayeghi kuthoku lo ikiqi ilove nani;

¹⁰ panongu ye azütakikihi küka lo süvetsü nani; panongu ye tüngtüghaqo saje shive nani.

¹¹ Ikemu akükau ye Alhou lau no alovi nani; Alhou je lono tushoqhi kemi kümtsü no Pa sheqhe nani, Kughengu akimkimi kichi ye lakhave tsü nani.