LESHELE 62 - Sumi Naga CL (Re-edited) Bible (BSI)

I Ngulho no Alhou Ngokhe Ani

Davidw Leshele

¹ I ngulho no iqüghai Alhou likhi ngokhe acheni; Pa launo Iw xakulu ighi cheni.

² Pa likhi no I tuqu eno I xakuluu, I liwo; ni ye ithave monani.

³ Nongu ye khitohi ilaqive niye nanashi akeu ghutu sükini akeshi timi lakhi qoqhini kea?

⁴ Pano kukughu ye akuchuqu-a lono pa sünhe qhiveni keu likhi ke. Panongu ye kichile lono aghapiqilu cheni. Pano kichi loye kümghatsü cheni, ikemu amlo lou ye panongu no ghusho cheni.

⁵ O I ngulho, iqüghai Alhou likhi ngokhe lo, kughengu I küpkhü ye Pa lau ani.

⁶ Pa likhi no I tuqu eno I xakuluu, I liwo; ni ye ithave monani.

⁷ I xakulupu eno I juküvüpu ye Alhou lau bepe ani; I kumto tuqu, I süshokulu ye Alhou ke.

⁸ O timiqo, ado kümtsü lo Pa pükhü lo; Pa zülo nongu mlo lheqhi lo; Alhou ye niw sükusho ke.

⁹ Akuchunimi ye atuthu kishedo lakhie; qhemghai xü chekemi küxü ye pishikiqhi ke; pama no ahu kimghi lo ikujue; pama kümtsa mighiju kelo atuthu kishe nguno akümthüue.

¹⁰ Süxakulu shou pükhü kevilo; aküpka shou adou küpkhü qhi kevilo; küakini ikowo aye, tipaqo shou nongu mlo be kevilo.

¹¹ Alhou no ghuthu lakhi pivae; I no akiniu ghi chiluvae: ti ye, aküka ye Alhouw ke,

¹² eno O Ampeu, iqemokeu kikimiye Ow ke. Kughengu pütüta kümla kiqi lono Nono milakhikhi asaxü tsü nani.