LESHELE 61 - Sumi Naga CL (Re-edited) Bible (BSI)

Atuqu Qholo I Sawulo

David Le

¹ O Alhou, I küqa chilu tsülo, I kighini ini tsülo;

² Kughou I mlo hauve keno, I no ayeghi shekhau no O kue. I nguno qhemghai keu tuqu lau I sasü wulo

³ kughengu No ye I sükushou ke, I ghümi launo süsholu kepu qoghe kumto ke.

⁴ I pelo O phiki lo alhokupuju ngo pelo! I pelo O chishibo kicheqho lo sükusho lulu pelo!

⁵ Kughengu, O Alhou, Nono I shoqhi chiluvae; Nono O je sümsa chekemi mheghi pesü I tsüvae.

⁶ Akükau xü pushu tsülo; pa pelo ampe kutomo xüpelo!

⁷ Pa pesü alhokupuju Alhou zülo kükalakhü lo iqa pelo; iqemokeu kikimiye eno pükhükulu no pa jukuto apelo!

⁸ Ikehu I no tsala kipetsü I shoqhi shikupu keu shi alholo O je sheqhe ale pheni.