LESHELE 60 - Sumi Naga CL (Re-edited) Bible (BSI)

Xaphekulupu Kighini

David Le. Pa no Naharaim ngo Zobah lono Arameami sasü aghü shike lono, eno Joab no Edommi 12,000 pithive kelono

¹ O Alhou, Nono ni milivae, ni ghukhe-a kubove tsüae; No ye amlo ideve ke; ningu pesü athoputho tsülo.

² Nono ayeghi süküghütha; Nono tipau küsütha no lhaphe ke; ti ipove keqo pukho tsülo, kughengu ti ye nanashi ani.

³ Nono Ow timiqo pelo aveküsa do sholu peke; Nono ni pelo atsaiji shopusü khokhoshi peniye ni tsüke.

⁴ O sümsa chekeqo ghenguno Nono michiphi süqhe, tishianguno pano pelo shexilika zülono polu peniye ke.

⁵ Nono qhuivü chekeqo xalu penike O u ajeu no xakulu tsüno ni khochile tsülo!

⁶ Alhou no Pa kimthe lono pivae: “Shechem eno Succoth Khila saje hami ye ajekipi shi I no kijethave nani.

⁷ Gilead ye Iw; Manasseh ye Iw Ephraim ye I kütsükuqho; Judah ye I yekipe küsü ke.

⁸ Moab ye I u kümtsü zübo; Edom shou I pukhukuqho qhi cheni; Philistia shou I no tokulu sütsa sheshue.”

⁹ Khuu no I sasü aliwo akeu mishighüna lo iloni kea? Khuu no I sasü Edom lo wuni kea?

¹⁰ O Alhou, No ye ningu milive ake kumo? O Alhou, No ye niw ghüshimi gholo no chemovae.

¹¹ O, aghümi mjochile akeu lo akukuphu ningu tsülo, kughengu timi kukuphu ye adoue!

¹² Alhou gholono nino tolu nani; ni ghümi qodani keu ye Pa ke.