LESHELE 6 - Sumi Naga CL (Re-edited) Bible (BSI)

Shiluküsa lo Kighini

Davidw Leshele

¹ O Ampeu, O mlo kighide lono I sakiyi kevilo, O loghu lono I sakiyi kevilo.

² I küpüqhiyi lo, O Ampeu, kughengu ni ye lhovae; I shipivi tsülo, O Ampeu, kughengu I ghi ye sükütüvae.

³ I ngulho ghi ighono sükütü anie. O Ampeu khitohi ado luni kea?

⁴ Tsüghü ighi lo, O Ampeu, I küxü xaphe tsülo; Ow iqemokeu kikimiye vecheo I xalulo.

⁵ Kughengu thive kethiu ye O kümsülu moae; Kithighau ye khuu no akishe O tsüluni kea?

⁶ Amlo ghime lono ni ye akulho shivae; ni ye kijili atsütsü anhezü no I lüpa pütsü cheni; I küqa no I lakhü zapütsü cheni.

⁷ Amloksa no I nhethi chuchumiyivae; I ghümi kümtsü ghenguno I nhethi qeivae.

⁸ Nongu alhoksa kümlami kümtsü I launo chevelo, kughengu Ampeu no I küqa sütsa chiluvae.

⁹ I no qhüiniju akeu Ampeu no chiluvae; Ampeu no I kighini ikhilu tsüe.

¹⁰ I ghümi kümtsü kujove nani eno shishe avesave nani; panongu ye idewove nani eno paikhavi shikujove nani.