LESHELE 59 - Sumi Naga CL (Re-edited) Bible (BSI)

I ghümi launo I Xalu lo

David Le. Saul no David pithive niye aki lo phu ighi kelo

¹ I ghümi launo I xalulo, O I Lhou; I lachile ithughi akeqo launo I süsho tsülo;

² alhoksa kümlami launo I xalulo eno ajiküxümi launo I xalulo.

³ Kughengu julo, panongu ye I küxü miqe ani; mkamihi kemi no I shou aküküpna xukutho ani. O Ampeu, I kipimi momu axine kiumu küha keghi,

⁴ I kipimi küha keghi panongu no I heqhi niye shie. Ithughi no I kuphu lo eno I veküsa ithulu tsülo.

⁵ No, Ampeu aqokitikhi Lhou ye Israel Lhou ke. Shiye kümtsü ghime kepushi ithulo; thekuchu shi kixikila kuchughu keqo khumu pheve kevilo.

⁶ Avela atsütsü panongu no ideighi no atsüqo toi igha eno mishighüna homxa ghi miqe iqhoiqi ke.

⁷ Panongu ye hule ani, pano kichi lono ghubolei igha ani panoqo mütsü lo azütakikihi ani— kughengu panongu no kümsü, “Khuu no ni tsa chiluni kea?”

⁸ Ikemu, O Ampeu, Nono panoqo junuqhie; Nono shiye kümtsü jukünatha.

⁹ O I kumto, I no O khejuni, kughengu O Alhou, No ye I liwo ke.

¹⁰ I Lhou no Paw iqemokeu kikimiye lono I sholu nani; Alhou no I pelo tokulu lono I ghümi shou jupuku lupe nani.

¹¹ Panoqo pithi kevilo, tikumo aye Iw timi no kümsümave nani; O küka pesü panoqo haküghütsüve no kuluqhive lo, O Ampeu ni züto!

¹² Panoqo kichi lo axine, amtsü lo atsa akeu ghenguno pano pelo pano qheküza lo kitimeve pelo. Ghukusho ngo akimki panongu no pike ghenguno,

¹³ aloghu no panoqo küzüve lo; panongu no kühave moke kutolo khonha luvelo, tishikeu lono ayeghi shekichi kutolo panongu no Alhou ye Jacob shou ayepe cheni kepi ithi nani.

¹⁴ Avela atsütsü panongu no ideighi no atsüqo toi igha eno mishighüna homxa ghi miqe iqhoiqi ke.

¹⁵ Panongu no achuqupu phusü iqhoiqi eno pano kive chhitoimo aye ighamku cheni.

¹⁶ Ikemu I no O kükakumto shipili ale pheni; inaqhe I no ighamku Ow iqemokeu kikimiye le pheni. Kughengu No ye I liwo eno I ghime küsa tsala lo sükusho-a lakhi ke.

¹⁷ O I kumto, I no shekiqhe le O lau pheni, kughengu, O Alhou, No ye I liwo ke, iqemokeu kikimiye I piye keu Lhou huke.