LESHELE 58 - Sumi Naga CL (Re-edited) Bible (BSI)

Alhou no Ayeghi lo Xaküthau

David Le

¹ Nongu yepemi ye mtsüqheino achipiu pesü azah tsü chenima? Nongu ye timi nuliqo lau süchou no xatha chenima?

² Moe, nongu ye amlo lono achipikumo kuchughu cheni; nongu u lono ayeghi lo hekiqhi bukiqhi peitha cheni.

³ Atita lo aphi lono kixikilami ye küqüve cheni; apunu lono ala vepimive eno akimki tsa picheni.

⁴ Panongu ye apighiw tüghü toi keu tüghü xapu cheni, tuopighi akini kughupou no chilu moveke toike,

⁵ apighi kümsümi sütsa chimlave momu küdüumi no müzü keu chimlave ketoi ke.

⁶ O Alhou, panoqo kichi lo ahu helave tsülo; O Ampeu, abongshuu lhothe hu akütsüghau helave tsülo!

⁷ Azü no qopühave ketoi panoqo ye hauve pelo; kughou pano no apiji pesü mijini keno mbabaive pelo.

⁸ Pano pelo tünhaqü no aniba lo ilove ketoive pelo, akithi shi punukeu nga no aküvü ithumlave ketoi pelo.

⁹ Panongu no mtha aphi lono alupi toi nhüve cheni, Panongu no xü aphi lono Pa loghu no fupe wuve nani.

¹⁰ Kughou amkhükulu ithulu keno amikuchomi no alovi nani; pa no kixikilami ji pelekeu lono apukhu qhu nani.

¹¹ Timiqo no pi nani, “Mtsüqheino amikuchomi ghenguno asaxü ani; mtsüqheino ayeghi shou xaküthau Alhou ani.”