LESHELE 57 - Sumi Naga CL (Re-edited) Bible (BSI)

O Juküvü no Ayeghi lo Alo

David Le. Pa no Saul zülo atuki lono pokelo

¹ I kimiyeqhiyi tsülo, O Alhou, I kimiyeqhiyi tsülo, kughengu I ngulho no No ije cheni; kütsakungo keu pasapagha no katha wuve moke kutolo O chishibo qholo I no ijeluni.

² Shishe Akughushu Lhou khuu no Pa kimji I lau shikupu tsücheni keno Pa lau ighamku ani.

³ Pa no kungugha lono puwu no I xalu nani; Pa no I qoda akeu shikukujo nani. Alhou no Paw iqemokeu kikimiye eno pükhükulu puwu nani!

⁴ I ngulho ye abongshuu dolo ani; ni ye mghamichi keu tüghashi dolo ihozü ani— timi nuliqo, panow ahu ye angupa ngo apijiqo ke, pano mili ye azütakikihi kütsügha ke.

⁵ O Alhou, kungugha shou O je süqhe lo! Ayeghiqha kümtsü lo O juküvü alupe lo!

⁶ Panongu no I pukhu lo ayitho thepe qhitsüe; I ngulho no aghimeküsa shive. Panongu no I la lo aqo chhupe qhi, ikemu pano likhi pano no tile ikiqi ilovae.

⁷ O Alhou, I mlo ye ithave moe, I mlo ye ithave moe! I no ale kithe eno ale kungo pheni!

⁸ Ithu lo, I juküvü! Ithu lo, O akighilebo ngo küghaküsü lebo! I no tsükutho küda puthuni!

⁹ O Ampeu I no timiqo gholo shikimthi keu pesü O tsüni; I no shiyeqo gholono shekiqhe le O lau pheni.

¹⁰ Kughengu Ow iqemokeu kikimiye kije no kungugha ikuto ani, Ow pükhükulu ye khüngküsü ikuto anie.

¹¹ O Alhou, kungugha shou O je süqhe lo! Ayeghiqha kümtsü lo O juküvü alupe lo!