LESHELE 56 - Sumi Naga CL (Re-edited) Bible (BSI)

I No Alhou Pükhüni

Philistiami no David küghaluve kethiu David Le

¹ O Alhou, I küpüqhiyi tsülo, kughengu timi no I qoda ani; atsala kupuju hale ighi akeu no I ghimeqhi ani;

² I ghümi no atsala kupuju I qoda ani, kughengu aqheküza shi I hale ighi akemi kutomo ani.

³ Kughou I no msave keno, I no O shou I küpkhü qhike.

⁴ Khuu tsa I no sheqhe ani keno, Alhou tipau shou I no pükhübe ani; ni ye msave monani. Timi no I lau kiu shiluni kea?

⁵ Atsala kupuju panongu no I ghüza cheni; pano kükümsü kümtsü alhoksa shinike I shou acheni.

⁶ Panongu no aküpüna xukutho, I ghüza niye miqe; panongu no I pukhune jukuto, I küxü luve tsüniye ngokhe ke.

⁷ Panongu ye pano kixikila lono pokalu nani keshea? O Alhou, aloghu lono ashiayeqo hekuluve lo!

⁸ I tukuchoqhi keu ye Nono kihipe ani; I nhezü kipiji ye O külabo lo süpüani. Tipaqo ye Ow kaku lo anike kumo?

⁹ Tishiaye kughou I no inikhuni keno tipau tsalani I ghümiqo ye idechile wove nani. I no hi ithi anike Alhou ye I ghenguno anie.

¹⁰ Alhou khuu tsa I no sheqhe cheni, Ampeu khuu tsa I no sheqhe cheni keno,

¹¹ Pa shou I no pükhübe cheni; ni ye msave monani. Timi no I lau kiu shiluni kea?

¹² O Alhou, ni ye O lau I shoqhi shikupu masa nani; shikimthi kümllagho O lau shikupuni.

¹³ Kughengu akithi lono Nono I ngulho xaphe tsüe, iyei, ikiqive kepu lono I pukhu xaphe tsüe, tishino I pelo aküxüpu küvü lo Alhou zülo alache wulu peke.