LESHELE 55 - Sumi Naga CL (Re-edited) Bible (BSI)

Ampeu lau O Makho Qhilo

David Le

¹ O Alhou, I kighini chilu tsülo, eno kimiye tsü penike I no qhüiniju akeu lono itshü kevilo!

² I hiju tsülo eno I khochile tsülo; I kumchho lono ni ye ngosü mlave no mlo ani,

³ ti ye aghümi ghügha ghengunoe, eno kixikilami no ghimeqhi keu ghenguno ke. Kughengu panongu no aküpüna I shou betsüe, eno panongu ye amloide no I mjochile axesü anie.

⁴ I lolo ni ye kütakihi ani; akithi küighüpu no I shou ikughivae.

⁵ Akümsa ngo thüthüshi keu I shou ikughi ani, eno kümsa kimshipu no I khonha luvae.

⁶ I no pi, “O, I no miqhedu toi achishibo aghi keaye lae! Ni ye yewuve no akulho qhiluni che;

⁷ iyei, ni ye putou itsü wuveni che; ni ye asayeqha lo ngoveni cheke.

⁸ Fukichighi mülhü eno pasapagha launo ni ye mtazü akicheqho phuwuni cheke.”

⁹ Kütsave lo, O Ampeu, panoqo tsa kübangüve tsülo; kughengu mishighüna lo hekiqhi eno mtomshu keu I no ithulu ani.

¹⁰ Putho pucho panongu no aliwo zümili mishighüna homxa ighi, akipimi ngo aküpüna no tile ani;

¹¹ kütsakungo no tipa mta lo ani; ghimeqhi keu ngo pishikiqhi no tipau kilhikishi-a lono anie.

¹² Kughengu I ghüthi püsütsü akeu ye aghümi no kumoe tishike aye ni ye puqhe luveni che; küthakügha shi I peitha akeu ye aghümi no kumoe tishike aye ni ye pa launo itshüveni cheke.

¹³ Ikemu hi ye I qhejo, I küsau, ithithai akeu I küsau noke.

¹⁴ Ningu kümtsa akükümsü jumghai lukile che; Alhou chineki lo kümtsa aqokitikhi gholo iqhoiqi cheke.

¹⁵ Akithi no pano küghaluve pelo; aküxü no Kithigha lo iqive pelo; kughengu alhoksa no panoqo kungo-a eno pano lolo anie.

¹⁶ Ikemu I no Alhou vilo inikhu, eno Ampeu no I xaluve nani.

¹⁷ Avela, inaqhe eno puchomghü lo I no muchho eno aghuju shi igha, eno Pa no I sütsa chilu tsüe.

¹⁸ I shou aghükishi kughu akeu launo Pa no sükusho shi I ngulho qhüchilelue, kughengu kutomo no I mjochile ani.

¹⁹ Mulho lono kükalakhü lo iqa chekeu Lhou no chilu no panoqo shikuchunive nani, kughengu panongu ye kili chemo eno Alhou sümsa chemoe.

²⁰ I küsau no pa u pesü pa küsami mjochile; pa no paw puloshoqhi hephove.

²¹ Pa tsapi ye akichhizütha toi müdüniyi, ikemu aghükishi no pa mlo lo ani; pa tsa ye thazü nguno mtshaminhei, ikemu panongu ye azütakikihi xajope ani.

²² O makho pesü Ampeu lau qhitsülo, eno Pa no o püxü tsü nani; Pa ye khilemu amikuchomi pelo ithave peni keu za tsümo nani.

²³ Ikemu O Alhou, kütsakungo keu qo lo Nono panoqo kulusüve nani; ajiküxümi ngo thekuchumi ye pano küxüdo tüxamu xüwo tomo nani. Ikemu ni ye O pükhübe ache nani.