LESHELE 52 - Sumi Naga CL (Re-edited) Bible (BSI)

Alhouw Iqemokeu Kikimiye

David Le

¹ O akumtou, kushiye alhoksa lono qheza cheni kea? Alhouw iqemokeu kikimiye ye atsala kupuju acheni.

² No pishikiqhiu, o mili no aqe kütsügha toi kütsakungo kuchughu cheni.

³ No ye akivi nguno alhoksau kimiye cheni, eno kiu no achipiu keno pini keu nguno alau miki cheni.

⁴ O pishikiqhi mili, nono ghüza keu tsaqo kümtsü kimiye cheni.

⁵ Ikemu Alhou no alhokupuju ghenguno o kütsave nani; o phiki lono Pa no o mxape süthave nani Pa no küxümi yeghi lono o nhüve nani.

⁶ Amikuchomi no ti ithulu no msave nani, eno pa junuqhi ishi pi nani,

⁷ “Alhou ijemo no pa küakini tule-pele akeu shou pükhübe, eno pa kütsakungove kepu ije wuve keu timi hu julo!”

⁸ Ikemu ni ye Alhou kilo olivebo thuwu aketoi ke. Ni ye alholo eno pülhapuju Alhouw iqemokeu kikimiye shou pükhübe ani.

⁹ I no alholo O shikimthini, kughengu Nono hi shive tsüe. I no O je lono Alhou küpülümi gholono lajukhe nani, kughengu hi ye akivi ke.