LESHELE 51 - Sumi Naga CL (Re-edited) Bible (BSI)

Tsüghükhüikeu Mlo Lhosü tsülo

David Le. Bathsheba sasü kikivi keu ghili Tungkupu Nathan no pa vilo pi kethiu

¹ O Alhou, Ow iqemokeu kikimiye vecheo I kimiyekütü tsülo; Ow kikimiye kupukuno shi akeu vecheo I hekibideqo nuxave tsülo.

² I kipimi lono I qhukimthe tsülo, eno I xine lono shikimthe tsülo!

³ Kughengu I no I kipimi ithi ani, I xine ye pülhapuju I zülo ani.

⁴ O hebide ghi I no axine shive no O nhethe lo kiu no alhoksa keno ti shivae, ikehu O tsa ye achipi loke eno Ow küghakütha lo tichetighe kühae.

⁵ Julo, ni ye axine lono punue, eno I za no axine lono I mishike.

⁶ Julo, No ye I mlo alou akikhi akeu lo azüvü cheni, eno Nono amlo tuqhou lono alokütsü I shika cheni.

⁷ Ayilobo pesü I shikimthe tsülo, eno ni ye mithelu nani; I qhukimthe tsülo, eno ni ye mürasü nguno metsüghoive nani.

⁸ I pelo alokivi ngo alokiqi chilu pelo; Nono aghi kubove tsükeqo pelo alovilu pelo.

⁹ I xine lono O gi küsüve tsülo, I kipimi kümtsü nuxave tsülo.

¹⁰ Amlo kimthe I lolo lhosü tsülo, O Alhou, eno achipiu ghungu I lolo sütsülo.

¹¹ O launo I hapupove kevilo, eno I launo O Ghungu Kimthe süwuve tsü kevilo.

¹² Ow xakulu lokivi I tsüchile lo, eno pulopinyi keu ghungu pesü I choqhe tsülo.

¹³ Tileno hekibidemi lau I no O laghiqo shika piye nani, eno axinemi no O lau xaide ighi nani.

¹⁴ O Alhou, aji pelekeu kipimi lono I xaphe tsülo, O I xakulu Lhou, eno I kichi lono O chipiu mikucho vekipighi shipilini.

¹⁵ O Ampeu, I mütsü xükho tsülo, eno I kichi lono O shekiqhe sheshuni.

¹⁶ Kughengu No ye aghakishi lo alokiqi shi chemoe, tikumo aye tipau tsüni cheke. No ye akipti kümllagho lo aloqilu chemoe.

¹⁷ Alhou lau aghakishi ye aghungu lo mlominyi keu ke, O Alhou, No ye küghüta kughuju mlo jukünathave chemoe.

¹⁸ O lokiqipu shi Zion lo akivi mla tsülo; Jerusalem liwo shiqhe tsülo;

¹⁹ tishianguno No ye achipiu ghakishi, akipti kümllagho eno kuchopu kipti kümllagho shou alokiqi shilu ani, eno amshitsü pesü O kümlla khache lo mllalu nani.