LESHELE 50 - Sumi Naga CL (Re-edited) Bible (BSI)

Alhou no Xaküthau

Asaphw Leshele

¹ Akughushuu, Ampeu Alhou no khetsünhe kipelau no kulolau kutolo ayeghiqha kusü no pütsae.

² Jukivi kupukülai keu Zion lono Alhou no yepüvü ani.

³ Ni Lhou cheni; Pa ye inaqhoi ngove chemoe; pitipüha chekeu mi no Pa zülo ani, pasapagha kumto no pa homxape ani.

⁴ Pa no Paw timi shou küghatha beniye atsütsü eno ayeghi kusü:

⁵ “I no pükhübe chekemi khunono aghakishi pesü I sasü puloshoqhi shive akeno panoqo I lau hekütsülo!”

⁶ Kungugha no Pa chipiu mikucho sheshue, kughengu Alhou ampi no küghaküthau ke!

⁷ “O Iw timiqo, I no pinike inilo; O Israel, I no o shou thopi shini. Ni ye Alhou, o Lhou ke.

⁸ O ghakishi ghenguno Ni ye o lomipi moe; o kipti kümllagho ye alhokuthu I zülo acheni.

⁹ Ni ye o ki lono amshitsü momu o tsüaqu lono anetsüqo lumo nani.

¹⁰ Kughengu aghasa lo tüghashi eno atoghi lo atsüaqu qhethonhe akeqo kümtsü Iw ke.

¹¹ Atoghi lo aghau akeqo kümtsü I no ithi ani, eno aluza lo itikiche pokiche kümtsü Iw ke.

¹² “Tsala I no müzüthi aye, Ni ye o vilo pini chemoe, kughengu ayeghiqha eno tile akeu kümtsü Iw ke.

¹³ Ni ye amshitsü shi chu momu anetsü ji yecheni keshea?

¹⁴ Shikimthikütsü ghakishi pesü Alhou mlla lo, eno Akughushuu lau o shoqhi shikeu shikupu lo,

¹⁵ eno shiluküsa tsala lo I kulo I no o xalu nani, eno nono I sheqhe nani.”

¹⁶ Ikemu kixikilami lau Alhou no pi: “No ye I yezah phisüni ke momu o kichi lo Iw puloshoqhi pini keu chipiu kiu ani kea?

¹⁷ Kughengu shikümzü sakiyi keu nono mithi eno I tsa peve cheni.

¹⁸ Nono küpkami ithulu aye, pa gholo amlokiqi shiuve, eno küsalhami loji sasü kuloji wuve cheni.

¹⁹ “Nono o kichi ghasü mono kixikila tsa pike, eno o mili no pishikiqhi kughu cheni.

²⁰ Nono iqa no o thiküzüu külakeu tsa pike; nono o thiküzüu ghi pipüthae.

²¹ No ye thime hipaqo shivae, ikeghi Ni ye inaqhoi ighivae; nono kümsü keu no nighi o toi kemi küghashi ani. Ikemu itehi I no o lomipi ani eno ngukube keu o zülo süghi ani.

²² “Tishiaye no Alhou kümsümave keu, hi amichi shilo, tikumo aye xaluni kemi kühano I no o sütha pinyive nani;

²³ Khuu no shikimthikütsü pesü akümllagho shi tsüni keno I je süqhe tsü ani; khuu no pa laghi kithikiyi qhini keno I no Alhouw xakulupu piye nani!”