LESHELE 5 - Sumi Naga CL (Re-edited) Bible (BSI)

O Chipiu mikucho lono I Sachelo

Davidw Leshele

¹ I tsa ini tsülo, O Ampeu; I ghuju kümsüju tsülo.

² I kükau eno I Lhou, I küqa ghügha chilu tsülo, kughengu O lau I no inikhu ani.

³ O Ampeu, Nono inaqhe I sütsa chilutsü cheni; I no inaqhe O ghenguno aghakishi kutope jukutoe.

⁴ Kughengu No ye kixikila lo azüvü chekeu Lhou kumoe; küsakügha ye O gholo ngomlae.

⁵ Aqheküzami ye O nhethe lo puthugho mlae; küsaküghami kümtsü Nono mithie.

⁶ Khunono akimki tsa picheni keno Nono kütsave; Ampeu no aji pele kemi ngo pishikiqhimi jukuchhube cheni.

⁷ Ikemu Ow iqemokeu kikimiye kupukuno akeu vecheo, ni ye O kilo ilolu nani. O sükümsa lono I no O kimthe chineki küdau pishiqho nani.

⁸ I ghümi anike O chipiu mikucho lono I sachelo, O Ampeu; I zülo O laghi müzüchoi shitsülo.

⁹ Kughengu panoqo kichi lo kuchou kühae; pano lolo shiküpsapu likhie; pano kughoki ye akumoki lhaphe püakeu ke; pano mili no akimki picheni.

¹⁰ O Alhou, panongu pelo pano kipimi xapu pelo; pano mijekütsü lono ikiqive pelo; panoqo xine ihulove akehu hapheve lo, kughengu panongu ye O hebidevae.

¹¹ Ikemu O launo sükusho luche kemi kümtsü alovilu pelo; panoqo pelo alhokuthu alovi alephe pelo, eno Ow sükusho no panoqo khonha luvelo, tishikeu lono O je kimiye chekemi pelo alovilu pelo.

¹² Kughengu Nono amikuchomi kümghatsü cheni, O Ampeu; Nono kikimiye pesü azüto toi pa küzüpe acheni.