LESHELE 49 - Sumi Naga CL (Re-edited) Bible (BSI)

Kushiye Adoküsa lo Ni ye Msani kea?

Korah Nuliw Leshele

¹ Timi kümtsü no hi inilo! Akini xükholo, ayeghiqha lo küghüna akeqo kümtsü,

² akuchunimi eno chuqumghai kemi, kinimi eno kumlhomi!

³ I kichi no alokütsü tsa pini; I mlo lo kümsükutho akeu ye vethakulu shi nani.

⁴ I no ahole lo I kini kugho puwoni; akighilebo küigha ghi I no phiküghüzü tsa kiqi hephove tsüni.

⁵ Kughou alhoksa tsala ighi no kixikila pishikiqhimi no I süho luveni keno ni ye kushiye msani kea,

⁶ kushiye aküakini shou pükhü eno pofushi akeu shou qheza chekemi msani keshea?

⁷ Kuchou no khumu khuu xaphe lumo nani, momu pa küxü me kiu qhemi keno Alhou tsümla nani,

⁸ kughengu pano xakipheme ye amekusho kehu khilemu lukümkha shi ame tsüve mlae,

⁹ tishino alhokupuju xüauve no khilemu aqokutho ithulu mokeu ye shive mlae.

¹⁰ Kughengu pa no ithulu anike alokütsümi ghi thive cheni; mbomzümi eno anikhami ghi aphiphi shi pühave cheni eno pano küakini ye kütami lau qhivetsü cheni.

¹¹ Panongu no ayeghi pesü pano je lono kuluve namu, pano kumoki no pülhapuju pano ki eno tiqheli kümtsü lo panoqo kungo-a shive cheni.

¹² Timi ye ahukülü shi xü acheuve monani; pa ghi tüghashiqo pühave ketoi nani.

¹³ Khunono pano ampi shou pükhübe eno pano papemi khunono pano tsa ikhilu cheni keno pano laghi ye hike.

¹⁴ Ambe toi pano ye Kithigha lo wuveni pütsae; akithi no pano kheu shive nani, eno inaqhe amikuchou no panoqo shou ayepe nani. Pano phimpi ye aki kühano akumoki lono tsümave nani.

¹⁵ Ikemu Alhou no Kithigha küka lono I ngulho xaphelu nani, kughengu Pa no ni ikhilu nani.

¹⁶ Kughou milakhi no kinimi shiveni keno, pa kilo ajekipi alau ikowove kelo amlo kütakihi kevilo.

¹⁷ Kughengu pa no thive kethiu pa ye kiumu pewomo nani; pa jekipi ye pa papesü wuve monani.

¹⁸ Kughengu pa xülo pa ampi no pa ye müghae pi anamu, —o ghenguno akivi shilu kelo akishe ithulu anamu—

¹⁹ pa ngulho ye pa puasü tiqheli lo idewove nani, khilemu aküvü ithulu kithe moae.

²⁰ Milakhi no akini tule-pele anamu alokütsü küha kelo tüghashi toi pühave nani.