LESHELE 46 - Sumi Naga CL (Re-edited) Bible (BSI)

Alhou ye Niw Aliwo

Korah Nuliqo Le

¹ Alhou ye niw ijekulu eno ni kumto ke, shiluküsa lo kuphu tsünike ani.

² Ikehu ayeghi sükinile namu ningu ye msamo nani, naghuto no azüghi lo ilove na,

³ azüghi no tukide igha ighi na, azüghi no qoighi keu no naghuto ithauve namu msamoe.

⁴ Alhouw mishighüna, Shishe Akiqheu kimthe ghüna-a lo alokivi qoipeighi chekeu ghoki lakhi ani.

⁵ Alhou ye aphughi lo ani; li ye ithamo nani; kughou inaqhe vüipeghi keno Alhou no li kuphutsü nani.

⁶ Shiyeqo no aloghu ide ani, kükaqhaqo ikiqivae; Pa no Pa sütsa sheshu, ayeghi no mlaghubeive.

⁷ Aqokitikhi Mpeu ye ningu gholo ani; Jacob Lhou ye niw sükusho liwo ke.

⁸ Ighilo, Ampeu kümla julo, Pa no kishi ayeghi lo küghüküghalei süghi kela!

⁹ Ayeghi shekha kutolo Pa no aghükishi kishekhave tsüe; Pa no shexilika ngo angupa hechheve tsü; Pa no khurkulu ami lono pitive tsüe.

¹⁰ “Iqüghai lo, eno Ni ye Alhou kepi ithilo. Shiyeqo gholo I je süqhe nani, ayeghi lo I je süqhe nani!”

¹¹ Aqokitikhi Mpeu ye ni gholo ani; Jacob Lhou ye ni sükusho liwo ke.