LESHELE 45 - Sumi Naga CL (Re-edited) Bible (BSI)

O Kükalakhü ye Alholo ke

Korah Nuliqow Kikimiye Le

¹ Atsato kivi no I mlo lo qole ani; I no I lejo pesü akükau huthue; I mili ye akiyemi yesüta kutope aketoi ani.

² Timi nuliqo gholo shishe aju-akoghe akiviu ye noke; o mütsü lono küpükini qole ipeghi; tigheno Alhou no alhokupuju o kümghave tsüae.

³ O jekipi eno akughushu lono o zütakikihi o yiku lo chhepu lulo, O akumtou!

⁴ Kuchou, akümtsha, eno achipiu mikucho ghenguno o kughushu lono tokulushi chewu lo; o u ajeu pelo akümzapu kümla o shikalu pelo!

⁵ Akükau ghümi mlo lo o piji ye tsüghaminhei ke; ashiayeqo ye o qholo ikiqi ani.

⁶ O Alhou, O kükalakhü ye alhokupuju eno alholo ke. O kükaküsü ye achipiu küsü ke;

⁷ No ye achipiu mikucho kimiye eno küsakügha mithi ke. Tighenguno Alhou, o Lhou no o küsami nguno alau alokivi thazü pesü o nukishe ke.

⁸ Ow chijeboike phi ye myrrh, aloe, eno cassia xono chhitoi. Akühaghi no ananu shikeu kighiki lo akighilebo no o lopivi tsüe;

⁹ kükami ngaqo no o gigihupu totimiqo gholo ani; o u ajeu kükaliu no Ophir meshoyi pepusü puthugho ani.

¹⁰ O ayiliu, inilo eno kümsü julo, eno o kini kugho puwolo: ow timiqo eno o pu kibolomi kümsümave lo,

¹¹ eno akükau no o jukivi jumine nani. Pa ye o mpeu ke ghenguno, pa zülo pishiqho lo.

¹² Tyremi no agho pesü ighi nani, kinimi no o mlo chuniye phuighi nani.

¹³ Kükaliu ye ameshoyi no ghoküna keu phimini pepusü li chebo lo jukivipu shi ani.

¹⁴ Li no chijeboike phi alabe jeli no shikeu pepusü li qelimi no apape no akükau lau sawue.

¹⁵ Panongu no akükau kighiki lo iloghi kelo alokivi eno alokiqi lono panongu sasü iloe.

¹⁶ O pu züqhulo o nuliqo anani; nono panoqo pesü ayeghi lo kükapumi shive nani.

¹⁷ I no tiqheli kümtsü lo o je kümsülu chepe nani; tighenguno shiyeqo no alholo o sheqhe chenani.