LESHELE 44 - Sumi Naga CL (Re-edited) Bible (BSI)

Sükusho Kighini

¹ O Alhou, ni puasüqo no pikeu ni kini lono chiluvae, wovekeu ghuloki lo Nono kiu kümlaqo mla keno chiluvae.

² No ampi no shiyeqo hapheve, eno ni puasüqo shosüve; Nono ashiayeqo ghimeqhi, ikemu ni puasüqo khaqhi pheve;

³ kughengu pano zütakikihi pesü ayeghi leluke kumoe, momu pano kumto no pano xaluke kumoe, ikemu O u ajeu eno O kumto, eno O gi küvü vecheo ke, kughengu Nono panoqo shou O züküvü ake.

⁴ No ye I kükau ke, O Alhou; Jacob ghenguno xakulu kuto tsülo!

⁵ O vecheo nino ni ghümi tuha kulue; khunono ni shou ithughi keno nino O je pesü panoqo qoda ke.

⁶ Kughengu ni ye Iw shexilika pükhü chemoe, I zütakikihi ye I xalumo nani.

⁷ Ikemu Nono ni ghümi launo ningu xaluvae eno khunono ningu mithi cheni keno panoqo shikujovae.

⁸ Ningu ye Alhou lau alhokuthu akijivile cheni, eno ningu no shikimthi keu pesü alholo O je sheqhe anani.

⁹ Ikemu Nono ningu milive eno ni pelo akukujopu shivepe eno niw ghüshimi gholo wumove.

¹⁰ Nono ni pelo ni ghümi launo idechile wuvepe, eno ningu mithi chekeqo no nino xulelu keu thime luve tsüae.

¹¹ Nono ningu pesü ghiqhive niye akeu ambe toivepe eno shiyeqo gholo kutholeve.

¹² Nono ame mlalei ningu jeve, panongu jeme kutomo khumoe.

¹³ Nono ni kisüghümi pelo ni jukünatha peke, ni sükümxa lo akemi küthakügha eno thokügha shive peke.

¹⁴ Nono ni pelo shiyeqo tichetighepu shipe, ashiayeqo zükutunupu shivepe.

¹⁵ Atsala kupuju I kukujopu no I zülo ani eno akukujo no I gi küzü luvae,

¹⁶ thoküghami ngo msükutho chekemi sütsa chilu kelo, aghümi ngo amkhükulumi zülo akukujo no I gi küzü luvae.

¹⁷ Ningu ye O kümsüma mphi, eno Ow puloshoqhi lo kichile shive mphi keghi, hi kümtsü ni shou ikughivae.

¹⁸ Ningu mlo ye athiu idewo mphi, momu ni pukhu ye O laghi lono wuve mphi;

¹⁹ ikeghi Nono atineqo-a lo ningu heqhipe qhive eno akithi yekükhü pesü ningu khonhape qhive.

²⁰ Tsala ningu no ni Lhou je kümsümave aghi aye momu inaghami lhou lau ningu u peqhe püaghi aye,

²¹ Alhou ye phuphe mlani keshea? Kughengu Pa ye amlo lo tuqhou akeu ghi ithi ani.

²² Ikeghi O je ghenguno atsala kupuju ningu ghiqhi acheni; ghiqhiveni ye akeu mbe toi ningu peitha cheni.

²³ O Ampeu, ithulo! No ye kushiye zü ani kea? No ampi haputhu lo! Alholo ningu milive kevilo!

²⁴ Kushiye No ye O gi küsüpe ani kea? Kushiye No ye ni ghime eno ni qoqhikeu kümsümave ani kea?

²⁵ Kughengu ni ngulho ye ayeghimkhu lo ikiqipe ani; Ningu kive ye ayeghi lo dape ani.

²⁶ Ithulo; ni kuphu kepushi ighilo! Ow iqemokeu kikimiye lono ni qhüchile lulo!