LESHELE 43 - Sumi Naga CL (Re-edited) Bible (BSI)

O Küvü eno Kuchou Puwulo

¹ I chipiu she petsülo, O Alhou, Alhou kümthami lachile no I tsakükügha lo I süsho tsülo, pishikiqhimi eno achipikumo shiche kemi launo I xalulo!

² Kughengu No ye I no ijelu chekeu Lhou ke; No ye kushiye I milive akea? I ghümi no I ghime ke ghenguno ni ye kushiye mloqani kea?

³ O küvü eno kuchou puwulo; tipaqo no I sache pelo; tipaqo no O kimthe toghi eno O kungo-a lo I sasü ighi pelo.

⁴ Tileno Alhou kümlla khache lo, shishe I lovilu chekeu Lhou lau wuno akighilebo pesü O sheqheni, O Alhou, I Lhou.

⁵ O I ngulho, kushiye aghüthisü eno I lolo pütaqhi ani kea? Alhou lau pükhülo; kughengu ni ye itaghi Pa sheqhe nani, I xakuluu eno I Lhou.