LESHELE 42 - Sumi Naga CL (Re-edited) Bible (BSI)

Kaku Akiniu Pighive Kemi Kighini

Korah Nuli Le

¹ Ashe no atuthu küha aghokiti zü phuche keshi, I ngulho no atuthu küha O phucheni, O Alhou.

² I ngulho no tüghüthi Alhou, aküxüpu Lhou phucheni. Kughono ni ye Alhou zülo wuluni kea?

³ Putho pucho kupuju I nhezü no I khuna shie, atsala kupuju panongu no I vilo pi, “O Lhou ye khile ani kea?”

⁴ I no I mlo lheju kelo, kishi aqokitikhi gholo wuno panoqo saphesü Alhou kilo tiqhetini pini akeu lo shekujo wuno alovi igha eno shekiqhe le pheche keno thime hipaqo I no kümsülue.

⁵ O I ngulho, kushiye aghüthisü eno I lolo pütaqhi ani kea? Alhou pükhü lo; kughengu ni ye itaghi Pa sheqhe nani, I xakuluu

⁶ eno I Lhou. I ngulho ye I lo lono aghime shi ani; tighenguno Jordan eno Hermon yeghi lono Mizar Naghuto lono I no O kümsülue.

⁷ O züphapha ghügha igha kelo, akuthoku no akuthoku kue; azü kighide qochile ilove keu ngo qoipeghi keu kümtsü I shou ikughivae.

⁸ Puchou no Ampeu no Paw iqemokeu kikimiye piye, putho lono Pa le no I lolo ae, I küxü Lhou lau akighini shie.

⁹ I no I Lhou I tuqu vilo pi: “No ye kushiye I kümsümave ani kea? Kushiye I ghümi no I ghimeqhi keu ghenguno ni ye qanimlo ani kea?”

¹⁰ Akithipu ghüzaku no I ghi lo akeshi I ghümi no I thogha ani, atsala kupuju panongu no I vilo pi, “O Lhou ye khile ani kea?”

¹¹ O I ngulho, kushiye aghüthisü eno I lolo pütaqhi ani kea? Alhou lau pükhülo; kughengu ni ye itaghi Pa sheqhe nani, I xakuluu eno I Lhou.