LESHELE 41 - Sumi Naga CL (Re-edited) Bible (BSI)

I Küpüqhiyi tsülo, O Ampeu

Davidw Leshele

¹ Khunono kumlhomi jukuto cheni keno pano lokivipue! Shiluküsa tsala lo Ampeu no pa xaphelu cheni;

² Ampeu no pa süsho eno püxütsü cheni; pa no xü akeu yeghi lo pa ye alokivipu timi ipi kucheni; pa ghümi no kümsü pulo akeu lo No ye pa phesüve chemoe.

³ Pa no aküsü lüpa lo akelo Nono pa püxütsü cheni; pa no küsükini shi akelo Nono pa shiaji athoputho tsü cheni.

⁴ I no pi, “O Ampeu, I küpüqhiyi tsülo; I shipivi tsülo, kughengu I no O shou axine shivae!”

⁵ I ghümi no axeküsü tsa I vilo pi, “Pa ye kughono thive no pa je kümsümave nani kea?”

⁶ Kughou milakhi no I xuju ighi keno, pa no abokümsa tsa pie, pa mlo no axine hekütsü eno kughou pa no ashou ipeni keno, pa no aqha lono pikülha ke.

⁷ I mithi chekemi kümtsü küqhano I ghili kügha cheni; panongu no I ghenguno alhoksa kümsü cheni.

⁸ Panongu no pi, “Akithipu thime pa shou lepuku ani; pa no khile ihozü ani keno tileno ide ithughi lumoae.”

⁹ I küsau I punukhoi akeu khuu I no pükhübe eno I shopa chucheni keno pa no I shou pa pukhu süqhe ani.

¹⁰ Ikemu I küpüqhiyi tsülo O Ampeu, eno I süqhe tsülo, tishiaye I no panoqo lochileni!

¹¹ Hipau vecheo No ye I lau azüvü anipi I no ithini: I ghümi ye I shou tokulu shi ighamku monani.

¹² Ikemu I kikhi ghenguno Nono I xaqhe nani, eno O zülo alhokupuju ngolupe nani.

¹³ Pülhapuju lono pülhapuju kutolo Ampeu Israel Lhou sheqhelo! Amen, Amen.