LESHELE 40 - Sumi Naga CL (Re-edited) Bible (BSI)

I Kukuphuu eno Xaphekuluu

¹ I no kheakulu shi Ampeu khe ani; Pa no I lau kughopuwo no I küqa chilu tsüe.

² Pa no aküighüpu kuthoku lono eno anixoxo lono I sünhephe luno I pukhu pesü atuqu shou ghope qhitsü, eno I nepa mtotoi shitsüe.

³ Pa no ni Lhou shekiqhe le, ale akithe I kichi lo sütsüe. Kutomo no ti ithulu no ighüve nani, eno Ampeu shou pükhübe nani.

⁴ Khuu no Ampeu pükhü cheni pishikiqhi laghi lo wuvemo, aqheküzami lau idewo moni keno pano ye akümghapue.

⁵ O Ampeu I Lhou, Nono ni lau Ow akümzapu kümla eno O kükümsü kutho kutomo shitsü; khunomu O sasü kimghi mlae! I no asheshuni eno tipaqo pini, ikemu ti ye pikhaluni chemoe.

⁶ No ye aghakishi eno akümllagho shou alokiqi shimoe, No ye akipti kümllagho eno axine kümllagho avehupu shimoe, ikemu Nono O kini kugho puwo I tsüe.

⁷ Ikehu I no pi, “Ni ye ighivae; liküküzü kaku lo I ghenguno ishi yepüani:

⁸ O I Lhou, O gho-apulou shinikeu no I züküvüe; O yezah ye I mlo lo anie.”

⁹ Ahoho kije lono I no xaphekulu lokivi tsa pive tsüae; O Ampeu, Nono ithi aketoi, ni ye I mütsü lakha püamoe.

¹⁰ Ni ye Ow xakulu pesü I mlo lo küsü püamoe; O pükhükulu eno Ow xakulu ghili I no sheshuve tsüae; ni ye ahoho kije lo Ow iqemokeu kikimiye eno pükhükulu ghili pesü küsüpe püamoe.

¹¹ O Ampeu, Nou ye Ow küpükini I launo ikhivemo nani; Ow iqemokeu kikimiye eno pükhükulu no I püxüpe anani!

¹² Kughengu kihikhakümla küküpna jeli no I sühope ani; I xine no I haluvae eno ni ye kiumu ithulu movae; tipaqo ye I kütsü lo asa nguno akichiu ani eno I mlo hauvae.

¹³ O Ampeu, kimiyekütü tsüno I xalulo! O Ampeu, mtazü I kuphu tsülo!

¹⁴ Khunono I küxü pühave tsüniye phucheni keno akukujo lo ilove no aghüthisüve pelo; khunono I ghüza nike azüküvüshi acheni keno, pano hachileve no akukujopu lo ilove pelo.

¹⁵ Khunono I vilo, “Aha, Aha!” ipi ani keno pano pelo akukujo vecheo thibuive pelo.

¹⁶ Ikemu O phuche kemi kümtsü pelo O lau alovilu pelo; khunono Ow xakulu kimiye cheni keno pano pelo tamono “Ampeu ye kiutoi kije kelae” ipi pelo.

¹⁷ Ni ye kumlhomi eno akukuphu avehupu shi akemi ke, Ikemu Ampeu no I kümsülu tsüe. No ye I kukuphuu eno I xaphekuluu ke; Mtazü lo, O I Lhou!