LESHELE 39 - Sumi Naga CL (Re-edited) Bible (BSI)

I Küxü Tsala ye Khitohi Kea?

Davidw Leshele

¹ I no pi, “Ni ye I laghi jukutoni, tishiaye I mili pesü axine shimo nani; kixikilami no I zülo ake tivilo ni ye I kichi kujukha luveni.”

² I no atsa pimove no inaqhoive; tshamla namu I no kutuu ngoe, ikemu I ghime alau shikitheve.

³ I mlo alouno shukuthui ipeghive; I no kümsüju, ikelo ami iqü ipeghive; tithiu I kichi lono ishi pi:

⁴ “O Ampeu, I küxü shekha eno I tsala kihitha püakeu I pelo ithi pelo; I küxü ye kishi pai kühave nani keno I pelo ithi pelo!

⁵ Julo, Nono I tsala pesü auka qhemi kughulhove tsüae, eno I küxü mpe ye O zülo kiumu kumoe. Mtsüqheino timi kümtsü küxü ye atuthu kishe lakhi qhemie!

⁶ Mtsüqheino timi ye yekükhü toi wove cheni! Mtsüqheino ala küha keu lono panongu ye ime acheni; timi no akini pekütsü anamu khuu no luve nani keno mthae!

⁷ “O Ampeu, ni ye itehi kiu khe akepu kea? Iw lajupu ye O lau ani.

⁸ I kipimi lono I xaphe tsülo. Mbomzümi pelo I jukünatha pekevilo!

⁹ Ni ye atsa pimlavae; ni ye I kichi xükho movae, kughengu Nono I lau tishive tsü ake.

¹⁰ Nono I ghaqhi akeu tave tsülo; O u sügha lono ni ye lhovae.

¹¹ Kughou axine ghenguno sakiyi ghi Nono timi lakhi ghasüni keno, Pa no akighipi shi akeu Nono amimi toi kütsave tsü cheni; mtsüqheino timi kümtsü küxü ye atuthu kishedo lakhi ke!

¹² “I kighini chilu tsülo, O Ampeu, eno O kini kugho puwo I ghügha chilu tsülo; I no anhezü piji akelo inaqhoive kevilo! Kughengu ni ye O gholo kupokichemi lakhi ke, I puasü kümtsü toi shoinami lakhi ke.

¹³ I no cheve no kühave mphi lono I launo tsüghüve lo, tishiaye ni ye alovi kithelu nani.