LESHELE 38 - Sumi Naga CL (Re-edited) Bible (BSI)

I Qhive Kevilo, O Ampeu

Davidw Leshele

¹ O Ampeu, O mlo kighide lono I sakiyi kevilo, momu O loghu lono I ghasü kevilo!

² Kughengu O piji no I jiqhivae, eno O u no I shou ikughivae.

³ O mlo kighide ghenguno I shiaji lo aloino keu kühavae; I xine ghenguno, I ghi lo akumto kühavae.

⁴ Kughengu I kipimi no I kütsü shou ikughivae; akho kimshi toi, ti ye I ghenguno ighono mishisheivae.

⁵ I ghüzü-nikha ghenguno I ghüzaku ye münashui eno tsüle ani,

⁶ Ni ye pishepe ngo ani eno hedape auvae; atsala kupuju ni ye mloqa ani.

⁷ I philo aloinokeu kiumu kühae kughengu I phiashi kümtsü piti ani.

⁸ Ni ye miqemlei eno chishedape ani; I mlo kütakihi keu ghenguno I no mloqae.

⁹ O Ampeu, I no laju akeu kümtsü O zülo ani; O launo I mlo ghime küsüve moe.

¹⁰ I mlo no kukushi ani; I küka ye I launo kühavae, eno I nhethi lo aküvü ghi kühavae.

¹¹ I küsami eno I poshumi ghi I ghime lono putosü auvae, eno abolomi I punukhoi akeu ghi putou puthugho auvae.

¹² I küxü phuche kemi no alichhe thepe qhitsüe; I ghüza niye phuche kemi no kütsakungo tsa picheni eno atsala kupuju pishiqhi nike kümsükutho cheni.

¹³ Ikemu ni ye akini kughupomi toi chilu amoe, atsa pikümlami no akichi xükhomo ketoi anie.

¹⁴ Ni ye akini kughupomi, khuu kichi lo alomipi kepu küha keno pa toivae.

¹⁵ Ikemu O Ampeu, I no O khe ani; O Ampeu, I Lhou, Nono I khochile nani.

¹⁶ Kughengu I no pi, “I pukhu nepiyelu keu lo khuu no aqheküza shi keno pano pelo I shou alovipe kevilo!”

¹⁷ Kughengu ni ye veqhive niye milepe ani, eno I küsü ye I zülo alhokuthu acheni.

¹⁸ I no I kipimi piphe ani; I xine ghenguno ni ye amlo imevae.

¹⁹ Ikemu I ghümi ye mkamihi, panongu ye akumtoe, eno akumou lono I mithi akemi kutomo ani.

²⁰ Khunono akivi züqhulo alhoksa pesü I tsü keno panongu ye I no akivi pape kehu I ngukube ani.

²¹ I qhive kevilo, O Ampeu! O I Lhou, I launo putosüve kevilo!

²² Mtazü I kuphu tsülo, O Ampeu, I xakuluu!