LESHELE 37 - Sumi Naga CL (Re-edited) Bible (BSI)

Kixikilami eno Kivimi Kuwula

David Le

¹ Kixikilami ghenguno o mlo kütakihi kevilo; akumou mlakemi jupe anheshu kevilo!

² Kughengu panongu ye atsaneghu toi paikhavi hauve nani eno atsüni toi ighüive nani.

³ Ampeu pükhü lo, eno akivi mla lo; no yeghi lo küghüna no pükhükulu sasü shou-pau shilo.

⁴ Ampeu lau o züküvü alo, eno Pa no o mlo no pulo akeu pesü o tsü nani.

⁵ Ampeu lau O laghi kulhuqhi tsülo; Pa shou pükhü lo, eno Pa no mlatsü nani.

⁶ Pa no o mikucho pesü aküvü toi yepüvü tsü nani, eno o chipiu pesü puchomghü toive tsü nani.

⁷ Ampeu zülo iqünhei lo eno kheakulu shi Pa ngokhe lo; khuu no kixikila kümla shino pa laghi lo kinikülü shi ani keno pa jupe kütakihi kevilo!

⁸ O mlo kighide ghasülo, eno aloghu phevelo! O kütakihi kevilo; ti ye alhoksa lo likhi sailove cheni.

⁹ Kughengu kixikila kümlami ye ikhive nani, ikemu Ampeu pükhü kemi no ashoqhi yeghi ighilu nani.

¹⁰ Ado kitila apüzü kixikilami ye kühave nani; nono tsaqütsalei phuju namu, pa ye aghi move nani.

¹¹ Ikemu ivünhei kemi no ayeghi ighi luve cheni eno iqüghai keu lono pano lopiqilu nani.

¹² Kixikilami no amikuchomi shou küsüqe no ahu tsüghü piye cheni,

¹³ ikemu Ampeu no kixikilami junu cheni, kughengu pa tsala chekeu Pa no ithulu anie.

¹⁴ Kixikilami no kumlhomi ngo aqüaghami pithive niye eno achipiu shiche kemi ghiqhive niye azütakikihi süjo eno asüzü piqe cheni,

¹⁵ ikemu pano ghüshi züta no pano pithive nani eno pano süzü ye hechheve nani.

¹⁶ Kixikilami no nibonilei akeu nguno amikuchomi no aghulo akeu pavie.

¹⁷ Kughengu kixikilami umlo ye hechheve tsü nani, ikemu amikuchomi ye Ampeu no sünheqhe luve cheni.

¹⁸ Tukutiye küha kemi tsala Ampeu no ithi ani, eno pano mheghi ye alhokupuju ache nani;

¹⁹ alhoksa ghuloki lo panongu ye akukujo lo ilove pemo nani; püqümiye ghuloki lo panongu ye kupukuno shi anani.

²⁰ Ikemu kixikilami ye pühave nani; Ampeu ghümi ye atsüni kümtsha toike; panongu ye hauve, amchhi toi hauve cheni.

²¹ Kixikilami ye nalu no tsüchile chemoe, ikemu amikuchomi ye michhi mono tsü cheni;

²² kughengu Ampeu no kümghatsü kemi no ayeghi ighi luve cheni, ikemu Pa no ghushove kemi ye ikhive cheni.

²³ Kughou Ampeu no milakhi jupe amloqi luni keno pa laghi iqhikumto tsü cheni;

²⁴ pa no küpxalu namu ikiqi veqhive monani, kughengu Ampeu u no sünheqhe luve cheni.

²⁵ Ni ye lhothemi shiche no itehi ye kitemi shivae, ikemu amikuchomi pheve keu momu pa tianuli no khuchu cheghi keu ni ye ithulu mphie.

²⁶ Pa ye alhokuthu nibonilei pünatsü cheni, eno pa tianuli ye kükümgha shi cheni.

²⁷ Alhoksa lono tsüghüve no akivi mlalo; nongu ye alholo ache nani.

²⁸ Kughengu Ampeu ye kuchou xakütha kimiye cheni; Pa ye Paw timi phevemo nani. Panongu ye alholo püxü püacheni, ikemu kixikilami tianuli ye ikhive nani.

²⁹ Amikuchomi no ayeghi ighilu no tile alholo küghüna nani.

³⁰ Amikuchomi kichi lono alokütsü tsa picheni, eno pa mili lono kuchou xakütha picheni.

³¹ Pa Lhou yezah ye pa mlo lo ani; Pa pukhu ye nepiyeve chemoe.

³² Kixikilami no amikuchomi miqeju cheni eno pa pithive niye phucheni.

³³ Ampeu ye pa pelo kixikilami küka lo ilove pemo nani; momu atsakükügha lo pa saghi kelo kileve monani.

³⁴ Ampeu ngokhe lo eno Pa laghi papelu lo, eno Pa no o xaqhe no ayeghi ighi lupe nani; kixikilami ikhive keu nono ithulu nani.

³⁵ Kixikila, ayiküsami lakhi I no ithulu püae, cedar sübo toi qhasüpe ache.

³⁶ Ikemu pa ye thive no kühavae; I no pa phuju akemu ithumlave.

³⁷ Tukutiye küha kemi amichi shilo eno akümzümi ju püalo, kughengu külakishimi ghengu ye hithiu tsala kivi ani.

³⁸ Ikemu axinemi ye qhoi kütsave nani; kixikilami ghenguno hithiu tsala küha nani.

³⁹ Amikuchomi xakulupu ye Ampeu launo ke; aveküsa tsala lo Pa no panow sükusho-a ke.

⁴⁰ Ampeu no pano kuphu eno xalu cheni; Pa no kixikilami launo panoqo xaphe eno süsho cheni, kughengu panongu no Pa launo sükusho lucheni.